Oi sanak nan di rantau. Rindu ka kampuang sanak sudaro. Ranah bundo nan tacinto, tumpahan darah nan tak ka lupo. Masakan bundo maimbau pulang. Oi sanak silaulah juo kampuang kito.

Dalam tulisan ko denai bakisah, bacurito masakan mandeh. Nan banamo gulai asam durian gariang.

Harumnyo asam durian yo rang kampuang denai nan tau. Polagi, kalau asam duriannyo baru. Durian masak di ateh, nan indak masak pake karbit kato rang kini.

Asam durian adolah isi durian masak nan di pamalaman agak 2 malam lamonyo atau bisa labiah.

Kalau asam durian tu baru. Harumnyo lua biaso manggoda salero sanak. Jan kan dipake untuak manggulai gariang, di aduak sajo samo lado giliang aduhai sanak salero tabik di nyo. Apolai di pagatok jariang mudo, di panggang ikan asin. Lauak tukai kato rang kinali. Ndeh,,, sanak. Yo ndak tahan salero do sanak.

Supayo tau lo sanak ba a gulai asam durian gariang tu. Bia nak di uleh setek sanak. Gariang ko lauak batang aia sanak. Kalau lah gadangnyo sanak, lah sadapo atau labiah panjangnyo. Tu di sabuik Ikan namonyo di urang kinali sanak. Beda lo samo ikan bahasa indonesia sanak. Kalau bahasa indonesia, sadolah lauak ikan namonyo. Kalau di kinali sanak. Gariang nan lah gadang tu. Baru dinamokan ikan sanak. 😁😁. Lucu juo stek sanak. Pakaro ikan ko.

Ha, kini caro masak e lai sanak. Sungguah sangaik simpel sanak. Dak banyak bahan-bahannyo do sanak. Dak pake langkok sagalo macam bagai do. Barasiahan ikan gariang tadi. Iciah sasuai salero sanak. Kq kasaikua an nyo sanak masuak an dalam kuali tu jadi juo. Dak lai urang yang ka berang do. Apak paja sanang nian hatinyo sanak. Maliek lauak gadang dalam kuali. Raso ka di abihan ka saikua an nyo. 😂😂

Lanjuik sanak yo. Masuak an lado samo asam durian ka kuali sanak. Samo gadang onggok lado jo asam durian nyo sanak. Kalau asam duriannyo baru. Kalau lah agak lamo asam duriannyo. Saparo gadang onggok lado tu alah tu sanak. Beko asam bana gulai sanak rasonyo. 😂😂. Dak jadi apak paja manyalero makannyo.

Lah masuak lado jo asam durian tadi. Kalinco an sanak. Aduak-aduak sampe tacampua asam jo lado. Sudah tu. Masuak an lauak gariang nan lah babarasiahan tadi, tambahan daun kunyik yang baru sanak. Aduak lo salayang sanak. Agiah pati santan stek sanak, sudah tu tambah jo aia matah kuahnyo sanak. Jan pakek bana sanak. Mudah muak wak di nyo. Lanjuik, jarangan lah gulai sanak tu di ateh kompor lai. Jan lupo ma agiah garam untuak maikek raso. Beko ndak jadi lamak gulai sanak.

Kalau lah masak, buek juo lah sayua setek untuak ka kawan asam durian tu sanak. Daun ubi sajo sanak abuih jo aia alah tu sanak. Badaceh makan apak paja di nyo tu sanak.

Sakian dulu sanak. Raso di bibia tapi cawan. Lapa paruik jadinyo. 😂😂

Tantangan menulis hari ke - 32

#tantangangurusiana

Edisi MuLok