Dina iki dino Sabtu, anggonku mangkat kerja kawanan, jalaran anggonku tangi turu kerinan.

Apa sing ndadekake kerinan, ora liya ya mung amarga aku sewengi ora bisa turu.

Anggonku turu klisikan, ngglebag ngiwa ngglebag nengen tansah ora kepenak.

Sejene awak ora kepenak, ati uga ora kepenak .

Apa kang dadi penyebabe aku dhewe ora mangerteni.

Angen - angenku tumlawung mikir sing ora - ora.

Aku bubar entuk kabar saka anakku, dene putuku lagi ora kepenak awakke jalaran masuk angin.

Awake panas kepara panase ora mudhun - mudhun.

Kamangka anakku ( ibune putuku ) kuwi omahe adoh, dhewekke mapan ana ing Lampung dene aku omah ana ing Boyolali.

Bola - bali aku entuk kabar saka anakku sarana _*whatsapp*_ kang dikirim .

Aku nampa lan maca kanthi prihatin. Surasane nyritakkake menawa putuku rewel, sawengi - wengi putuku nyuwun gendhong nanging menawa digendhong mberot - mberot, menawa diselehake geger nyuwun gendhong maneh.

Bapak ibune bingung anggone arep nuruti piye karepe anakke.

Aku uga dikirimi _videone_ anggone rewel putuku. Aku nyumurupi kahanane, ora krasa pipi iki teles, nangis atiku, prihatin, memelas, meruhi rewele putuku.

Dhuh Gusti Allah Ingkang Maha Kuwaos,

Mugi paduka paring pitulungan dhateng wayah kula,

Paduka enggal paring kasarasan,

Paduka sirnakaken raos sakit saking wayah kula,

Mugi Paduka paring gampil dhateng sedaya urusan tiyang sepuhipun.

Aamiin.

Sejene ora bisa turu awakku krasa lungkrah, bola - bali krasa kudu menyang pekiwan bae, krasa pengin bobotan, krasa pengin toyan, nanging yen wus tekan pekiwan rasa kuwi mau ilang kabeh.

Dhuh Gusti Allah ingkang paring gesang, kula nyuwun kekiyatan!

Apa iki ya kang diarani awak tuwa?

Para pinisepuh nate ngendika ; " Anak putuku, aku ki wis tuwa, wis gerang, segere wis arang - arang"

Mangkono pangandikane simbah.

Yen dak rasa uga ana benere,

Umur yen wis _*kepala lima*_ ( wis seket tahun punjul ) dak rasak - rasakake kok saya ringkih.

Gampang kesel, atine goreh, angel turu, njur gampang kena lelara.

Apa ya ngono?

Contone aku dhewe, mung amarga dikabari putune sing neng adoh masuk angin bae, awake dadi gograk, rasane werna - werna.

Allahumma Robbanasi Adzhibilba'sa Wasyfi Waantasyafii Lasyifa'a lLLa Syifa'uka Syifaan Laa Yughadiru Saqaman.

Muga - muga putuku enggal diparingi mari ... !!!

Aamiin.

( aku sinau nulis , 27012018 )