Penulis : Amin Sakir

Mata'arè mella' ta' marè

Kaandengan ondem sè nyareddem

Pèsem tabhendem é ghilina tangès sè ta' ghellem èghem

Angèn tandes ngajuwes

Teddhâs dâri pangabâs sè ampon ta' bâs-bâs

Bhâbhâs talambhâs buwâna pékkéran sé ta' bârâs

E bhumé sè lagghi' amardâ

Apoy rebbhâng mèra ngadhârbhâng

Napso abhungbhâng patang tarajhâng

Masordep sadhâjâ pangarep

Sè atangdhâng ngambâng è konco'na dhâmar kambhâng

Naghârâ anga' maranga'

Sè atanara' ampon ta' asengnga'

È sabbhân kèlan ona' katèngal na'na' tor jhârna'

Sadhâjâna posang tasangsang nyèngla dâri palang

Bulâ sè jhâghâ tabhâbhâs

Marabhudhi parao kandhâs

Nyandhâng lara saèbu nyangsara

Parsasat ora' ampon èkerra'

Nyabâ tapalghâ' berrâ' arassa pegghâ'

Asèpsap...

Nyarè naong é bâbâna dâun nyamplong

Nalèka pètolong ampon ngabbher ka ghunong

Mata'arè mella' ta' marè

Amargha manossa ampon petteng atè

Èlang ngastètè

Loppa ka patè

Jhâu dâri pakonna Ghustè