#TantanganGurusiana hari ke 25

“Bak, aku pamit ndak ke bada kawan kudai.” Katau Amel ngan bak au yang dang sibuk di pondok keciak depan rumah au. Bak Amel njual deghian yang dang musim mbakini.

“Ndak kemanau kaba Mel, aghini ujan panas. Perai la pulau ngerayau sajau ni.” Masiah melayani pembeli yang dang miliah-miliah deghian manau yang alap.

“Alap galau stini yuk, deghian batang kami sughang. Rasau dijamin. Ndik ke rugi kamu ngambik yang ini.” Katau bak Amel meyakinka ayuk yang miliah deghian.

“ya au dang, ndak yang alap la kami ni mbeli. Aghinatu dapat tipu jemau. Katau au kuning alap manis, pas nyicip au dienjuk au yang luak itu. Pas yang mbatak baliak ukan yang kuning tu. Awak mbeli banyak, jauah pulau”

“di manau pulau kamu mbeli au?” tanyau bak amel yang nginak amel la bejalan ngan diah kawan sebelah ghumah. Di kinak au dai amel agak merengut. Tapi ndik dipeduluika nyau. Amel bejalan ngan Diah arah baliak ke dalam pekarangan ghumah.

“jalan di talo, kan banyak yang jualan di pinggir jalan tu. Yak ngulangi diau agi alangke jauh au bai. Nengkela pulau diau tu la dapat dusau au la nipuka jemau”

“yak amu yang kami ni ndak kamu belah sutiak-sutiak lasung, “ bak Amel meyakinka pembeli.

Akhir au bak Amel la lupau ngan anak gadis keciak au tadi yang rupau au la pegi ngan kekawan au. Amel ni mpai kelas 4 SD sekawanan ngan Diah. Samau sekelas beduautu. Setiap pagi berangkat sekul maju di antat bak Diah kernau bak Amel ni pagi-pagi la ke kebun. Apau agi mbakini dang musim deghian jadi kadang jak malam bak Amel ni nginap di pondok.

Bak Diah ni guru jugau tapi guru di SMP bukan guru bada Amel ngan Diah sekul. Jadi Amel kadang ngikut diantar ngan bak Diah. Sekalian ajau katau au pas bak Amel merasau ndiak kelemak an.

Aghi la ndak petang. Mak Amel yang mpai baliak jak bada sanak au ndak hajatan betanyau ngan laki au ke manau anak gadis keciak au ni tadi.

“ntah aku ndik nginak au agi. Tadi pamit ngan aku ndak ke bada kawan au beduau ngan diah. Tapi ndik kuajung kernau aghi ujan panas. Ndiak ku kinak diau jadi pegi, kernau diau masuak agi ke dalam” katau bak Amel sambil ngangkut deghian yang masih tesisa ke dalam kinjagh ndak dimasukka ke dalam rumah.

“yak ngapau sampai mbakini lum kilah baliak? “ mak Amel la resah. Soal au Amel ndik pernah ndik di ghumah la ndak maghrib ni.

“cubau tanyauka ngan Diah kudai, kalu diau adau di situ” katau bak Amel

Begegas mak Amel ke ghumah Diah yang letak au duau ghumah jak ghumah Amel, cemas ati au ni seolah adau firasat yang ndiak iluak.

“Assalamualaikum, mak Diah…”

“waalaikumsalam, ngapau mak Amel?” mak Diah keluar jak dalam rumah

“adau Diah di ghumah? Amel kami ni lum kila baliak sampai mbakini.”

“yak adau. Dang mandi diau mbakini. Ngapau pulau?”

“tu la, katau bak Amel tadi Amel ni ndak berayak bada kawan au ngan Diah diau nginak. Ndik diajung au pegi kernau aghi ni ujan panas. Memang ujan panas nian tadi tu.. laju ndik lasung Amel ni pegi. Masuak ughang beduau tu ke dalam. Cuman mbakini Amel ni ndiak bediyau. Amu diah ndik pegi, Amel ni kemanau?”

Diah keluar ndengagh mak Amel ngiciak ngan mak au

“ngapau wak?”

“kaba keruan kemanau Amel pegi Diah, sampai kini Amel tu ndiak bediyau di ghumah. Awak la ndak maghrib.”

“tadi tu kami memang ndak ke ghumah Dona wak, ndak mandi bada aiak sungai di belakang ghumah au tu na. Cuma tadi wak lanang ndik ngajung. Aku kicika ngan Amel degaula pegi. Cuma Amel masiah kila ndak. Kami beghusiak jerang baliak ke dalam. Udem tu aku baliak, ndiak keruan kalau Amel lasung pegi ke ghumah Dona.” Katau Diah panjang lebar. Wak lanang ni bak Amel, maksud au

Ya Allah Amel,,, kemanau kaba nak.. apau diau masiah di bada ghumah Dona aa?” mak Amel solah ngiciak sughang.

Lum sempat mak Diah njawab, datangla pak Sakir, ketua RT ngan duau ughang bapak-bapak jak dusun sebelah, cak au. Ngarah ke rumah bak Amel.

Bak Amel yang la masuk ke dalam ghumah jadi keluagh agi. Mak amel pun langsung belari ngapau ughangni betandang pas la ndak maghrib ke gumah au.

“mak Amel, aku ndak ngabarka kalau duau bapak ini jak siwak ghumah Dona, mbatak kabar tentang anak kamu.” Katau pak Sakir. Mak Diah ngan anak au jugau mendekat ndengar ka pak RT.

“Ngapau pak, ngan anak kami? Memang lum kila baliak diau ni awak la ndak malam.”katau mak Amel

“Amel ngan kawan au betigau ughang siang tadi mandi di sungai belakang ghumah Dona, ntah apau yang tejadi, amel, dona ngan uci tebenak, tebatak arus sungai yang memang dang deghas pulau akhir akhir ini. Yangkawan au sughang agi Irma diau masiah di tepi.”pak RT menjelaskan. Mukau mak Amel la merah gelisah.

“mangku luak manau anak kami pak?” tanyau bak Amel.

“nah itu lah, Amel ngan Uci lum dapat sampai jam 5 ni tadi. Dona dang kritis mbakini la dibatak ke ghumah sakit. Warga masiah ndalak……….”

“Ameeellllll……….!!”

Lum udem pak Sakir ngiciak, mak Amel la mekiak manggil namau anak au, ndiak lamau la tekulai lemas badan au umban ke tanah.

Pesan moral :

Ajal kitau ndiak pernah keruan. Walau itu adalah rahasia tuhan, paliang ndiak ndengagh kciakan jemau tuau itu lebih iluak.