Sok mindeng seuri sorangan mun ras inget kana tugas jadi Ketua Komunitas MGMP di program PKB. Jul jol sms dina Grup WA. Jebul sms ti GTK anu nitah kudu kitu, kudu kieu, mun teu dilaksanakan engke aya mamalana. Atuh puguh jadi matak soak, tacan pati kaharti ge panitah teh, buru-buru dikirimkeun ka anggota komunitas. Maksudna rurusuhan dikirim langsung ka anggota teh bisi maranehna katinggaleun informasi.

Jeung ceuk pikiran teh, pan informasina dina bentuk Pdf, doc, jeung xls, jadi kudu didonlot terus ditengetan dibaca ku sorangan.

Sakali-kalieun osok oge nerangkeun maksud eusi kiriman. Ngan dipikir-pikir mah, asana jadi kaleuleuwihi lamun dokumen datana dikirim, dituturkeun ku surahan bejer beas maksud eusi dokumenna.

Memeh lebaran, ngarah anggota komunitas babari log in. Pasword jeung username dikirimkeun hiji-hiji ka sakabeh anggota. Meakeun waktu dua poe mereskeun nu kitu hungkul ge, kaganjel ku sinyal nu lup lep bae jeung pulsa internetna beak.

Beres ngirim pasword, Grup WA jadi leuwih rame. Nu nanya hayang pindah jenjang, hayang pindah mata pelajaran, hayang milu UKG, hayang jadi anggota komunitas, hayang meunang nomer UKG, hayang boga NUPTK. Ku kuring dijawab dina grup ngarah nu boga masalah nu sarua teu nanyakeun deui. Karasa cangkeul jempol ngajawab pertanyaan nu ampir taya eureunna.

Can ge beres nulis, geus rajol sms teh, atuh WA teh teksna patumpuk, pabeulit, ngambay, loba teuing eusina. Terus ujug-ujug aya nu ngirim video teu araruni, jol deui teks panjang nerangkeun aherat jeung mangpaat daun Sirsak.

Geus puguh kuring nyieun Grup WA teh khususon pikeun urusan dines MGMP wungkul. Ari ieu lar sup naon we digebruskeun. Kuring ukur bisa gegetun bae dina hate.

"Bu Ketua, punten nyungkeun token kange log in ka sim.gpo."

Kukulutus teh jadi. Uleng mikir, naha bet menta token. Apanan geus dibere username jeung passwordna, kari der bae asup.

"Mangga aos heula petunjuk teknis cara log in anu diserat 11 lengkah dina WA, scroll we, pilarian. Pami tos kitu anggo pasword sareng username nu kamari dijaprikeun," cekeng teh mere bongbolongan.

Pleng teu aya respon. Dina pikiran teh dipapantes, meureun manehna keur ugal ugil hayang bisa log in, terus nga-verval satminkal. Matak lila meureun manehna disangka robot, atawa siap-siap lebaran heula.

Dua poe sanggeus Lebaran, manehna ngaWA deui.

"Bu, punten ah sakali deui, nyungkeun token-na. Nu kamari mah teu tiasa lebet bae. Ngange email kitu kanggo username-na? Paswordna ge asa hilap deui."

Ku kuring geuwat dibales WA-na.

"Cobian lebetna tina laptop Pa, tong ngango hape. Ngke tina laptop, pencet babarengan: ctrl B, alt L, spasi i. Terus ctrl C, shift D"

"Maksadna naon eta teh Bu?"

"Bapak Lemot ih... Cape Deh!"