“Assalamu’alaikum Dunsanak ambo di mano pun barado. Katiko hari sadang rancak tarangnyo bak kini, ambo ka malajuik an carito nan samalam tadi. Mudah-mudahan diberikan kemudahan oleh Allah SWT handaknyo, Aamiin ya Rabbal ‘Alamiin."

Carito sabalaumnyo bisa Dunsanak baco di siko : https://buyazulkifli.gurusiana.id/article/2020/3/kiper-maju-ka-muko-salasai-urusan-277115

Mak Mu’in tampak tadiam mandanga serbuan pertanyaan nan disampaikan dek si Udin. Kaniangnyo nampak bakaruik sarupo urang minum kopi paik.

“Ondeh... tambahlah gulonyo salayang lain, Mak Sutan.” Ruponyo memang Kowa Daun tadi taraso bana kaleknyo dek kurang gulo. Patuiklah balenggek-lenggek karuik kaniang Mak Mu’in dibueknyo.

Mak Sutan pun capek babaliak ka atalase kadainyo untuak maambiak sasendok ketek gulo pasia. Maklumlah, Etek Biyai lun juo pulang dari karajonyo sahinggo tapaso Mak Sutan maju-mundur, ka muko jo ka balakang malayani palanggan kadai kopinyo.

“Hmmm... Nyo baitu nah, Udin. Dalam hiduik barumah tanggo tu, harus ado saliang tulak ansua. Harus ado nan mangalah untuak nan ka elok tu. Udin kan dek alun mancubo, makonyo lamak sajo mangecek sarupo itu. Cubolah nanti dek Udin!” Mak Mu’in nampak sabana sarius dari raut mukonyo nan mulai mamerah sahinggo lah bantuak dendeng balado.

“Batua tu, Udin” sambung Mak Sutan sambil mamasuak gulo ka dalam Kowa Daun Mak Mu’in.

“Assalamu’alaikum Dunsanak ambo kasadonyo!” tibo-tibo Angku kali datang mambuek urang nan ado di kadai takajuik dek karano talampau sarius mandanga ota Mak Mu’in, Mak Sutan jo si Udin tadi.

“Ooo Angku Kali ruponyo... Wa’alaikumussalam. Masuaklah Angku!” jawab Mak Sutan manyambuik kadatangan Angku Kali di kadainyo. Angku Kali pun masuak kamudian duduak di sabalah Mak Mu'in.

“Ambo tadi sempat mandanga carito nan bakambang di kadai ko dari baliak pintu. Jadi, sabananyo indak ado nan salah do kalau induak bareh tu ikuik pulo bakarajo mambantu suaminyo. Walaupun nan kaptennyo di rumah tanggo tu tantu iyo nan laki-laki. Iko salah satu efek dari emansipasi wanita agaknyo. Sahinggo lapangan karajo samo-samo tabukak untuak laki-laki jo padusi. Tantu syarat jo ketentuan berlaku. Baitu kecek Ust Abdul Somad dalam caramahnyo tempo hari.” Angku Kali langsuang mamasuak an kajinyo di situ.

“Iyo, Angku. Cuma jan sampai pulo nahkoda tu dipacik dek nan induak-induak, bisa kacau ampok beko dibueknyo.” Si Udin nampak masih mangarati juo atau memang dek kurang satuju nampaknyo.

“Justeru itu lah, Udin. Makonyo harus ado SOP atau MOU nan jaleh antaro laki jo bini tamasuak jo mintuo bagai. Kadang nan anak jo minantu lai damai-damai sajo, tapi diangek-angekan dek mintuo nan indak satuju anaknyo ikuik bakarajo pulo. Atau dek ibo mancaliak minantunyo nan harus ikuik pulo mamasak jo mancuci piriang di dapua dek anaknyo karajo di kantua. Mak Sutan pun indak namuah kalah pulo mandanga kato si Udin.

“Maaf, Mak Sutan. SOP jo MOU tu apo pulo tu?!” Kini kaniang Udin pulo nan bakaruik mandanga istilah Mak Sutan.

“Ha ha ha ha...” Saisi lapau urang tagalak mandanga tanyo si Udin ko.

“Itu makonyo sakolah, Udin. Jan cuma pandai bamain domino jo koa sajo di kadai.” Mak Mu’in dapek kesempatan mambaleh cakak ka si Udin nan dari tadi manggalakkannyo.

“Satu samo main kini, Udin! Ha ha ha ha” Mak Mu’in takikiah dek galaknyo sahinggo hampia sajo Kowa Daun tadi taserak.

Si Udin nampak merah mukonyo cok udang nan digoriang. Maklumlah dek kuliknyo masih barasiah dek kurang bapaneh, alias acok duduak-duduak sajo di kadai kalau indak ado urang nan mambaoknyo karajo.

“Jadi, SOP atau MOU tu sacaro sederhananyo ado komunikasi nan jaleh dan saliang tabukak antaro suami jo isteri tamasuak jo mintuo bagai. Sahinggo nan isteri indak buliah lapeh tanggung jawab pulo sebagai ibu rumah tanggo, walaupun inyo alah bakarjo di kantua saharian. Jan sampai dek lah panek karajo, tu laki pulo nan disuruah-suruah mambali lado bagai ka lapau. Kan indak manakah pulo mode tu. Atau katiko laki pulang karajo, indak pulo dibuekan kopinyo karano laki lah biaso mambuek kopi surang. Nan mintuo baitu pulo, jan acok bana manyindia-nyindia minantu mantang-mantang inyo manumpang di rumah awak. Kan dek adaik kito pulo nan mambuek laki-laki tingga di rumah mintuonyo. Kecuali kalau minantu ko lai urang bapitih, mungkin bisa pulo nyo buek rumah surang untuak anak bininyo, atau paliang kurang nyo mangontrak pulo di tampek lain.” Tambah panjang sajo kaji Angku Kali tabukak jadinyo.

“Tapi, Angku. Kadang nan padusi ko pulo nan indak namuah ikuik lakinyo pindah dari rumah ayah jo mandenyo dek karano lakinyo urang indak bapitih.” Sambuang Udin masih managakkan pandapeknyo.

“Tagantuang pribadinyo lai nah, Udin. Kalau Etek lai indak takah itu do! Caliaklah Etek nio tingga di kadai sakaligus rumah, ruko kecek urang kini walaupun kondisinyo sederhana, indak sarancak jo sanyaman rumah rang gaek ambo. Bialah susah, asa dakek uda. Kan baitu kecek tukang dendang dalam lagunyo. Tibo-tibo Etek Biyai, bininyo Mak Sutan nan punyo kadai tu datang langsuang pulo manyolo ota kadai nan sadang angek-angek di sanjo hari tu. Baju dinas Etek Biyai pun masih alun sempat diganti sajak pulang maaja di sakolah tadi.

“Hmmm... Alun Uda buek an Angku Kali ko minum lai? Lah maota kariang se baliau dari tadi nampaknyo.” Etek batanyo ka Mak Sutan dek alun nampak nan ka diminum dek Angku Kali di meja dakek tampek duduaknyo.

“Itu iyo Etek pulo lai nah! Ibo pulo ambo mancaliak Mak Sutan lah payah ka muko kabalakang sajak tadi. Lah tambah langsing baliau ko!” kecek si Udin pulo disambuik galak urang di kadai. Samantaro Angku Kali cuma nampak senyum ketek sajo. Hanyo sakali-kali nampak jangguik hitamnyo bagoyang-goyang saketek dek manahan galak.

“Jadi malah kok baitu, Udin” jawek Etek Biyai sambia taruih ka balakang mambuek an Kowa Daun untuak Angku Kali.

“Jadi, mode iko lah, Udin! Kito barumah tanggo tu sarupo urang pai balayia ka tangah lautan gadang. Mako saluruah urang nan ado di kapa tu ikuik batangguang jawab supayo bisa sampai jo salamaik ka pulau nan dituju. Nan jadi nahkoda atau kaptennyo tantu iyo si suami. Nan si isteri harus bisa pulo mambantu nahkodanyo dalam mangendalikan kapa tadi dan juo untuak urusan paruik urang sakapa tu. Jan sampai ado nan managak an ego surang-surang sajo. Apolai katiko mahadang badai dalam rumah tanggo. Indak bisa salamaik kalau masiang-masiangnyo indak bisa bakarajo samo. Harus ado nan mangalah demi kebaikan basamo. Kalau lah ado nan mangalah, jan dianggap kalah pulo. Apolai dianggap remeh, indak diharagoi perjuangannyo salamo iko. Ingeklah, gampo jo tsunami tu tajadi dek karano adonyo energi nan takuruang di baliak kulik bumi ko. Sahinggo baitu inyo dapek celah kalua, marano awak dibueknyo.” Baitu nasihat Angku Kali.

“Iyo nah, Angku!” kecek Etek Biyai sambia malatak an sacangkia Kowa Daun di dakek Angku Kali.

Baitulah carito di kadai kopi Mak Sutan sanjo hari tu. Sabananyo kok dirantang, namuah nyo panjang. Rancak kito buhua nak nyo singkek. Kito ambiak sado nan kapaguno sajo. Mudah-mudahan carito tadi bisa mambukak pangana kito dan juo bisa kito ambiak hikmah jo palajaran di dalamnyo. Ambiak nan elok, buang nan buruaknyo. Kok ado salah kato, sakali lai ambo mohon dimaafkan. Sarato tarimo kasih banyak bagi Dunsanak ambo, apak jo mande ambo dimano pun barado. Silahkan barikan masukan, kritik jo sarannyo di kolom komentar. Dan Untuk Sahabatku semuanya, yang mungkin belum paham Bahasa Minang, Insya Allah nanti akan ditranslet atau dituliskan kembali versi Bahasa Indonesianya. Wassalamu’alaikum warahmatullahi wabarakatuh.