#Tantanganmenulis Bahasa Daerah

#Tantanganmenulis Hari ke 29

Pakiah Geleng VS Buyuang Koboi

Tasabuik lah di kota wisata Bukik Tinggi. Udaronyo sajuak, alamnyo rancak. Ado ngarai Sianok jo Panorama, ado Benteng Ford De Kock jo Kabun Bungo, baitu pulo lapangan pacu kudo Bukik Ambacang. Tasabuik lah dulu curito katiko masih ngenek. Duduak di bangku SD. Acok bamain di pasa Ateh, dek karano mangaji di Surau Ustadz Syarif. Lataknyo di muko Jam Gadang. Sabalun mangaji main ka pasa ateh, sudah mangaji main pulo baliak di pasa ateh. Sabalun masuak wakatu mangaji, kami (ambo jo kawan anak pasa) acok mancaliak urang minta sadakah. Baliau pandai bana balagu jaman lamo, satiok balagu salalu kapalonyo bageleng geleng, tangannyo manampuang pitih nan diagiah urang. Dek kalaponyo manggeleng geleng, mako baliau dinamokan urang 'pakiah geleng'. Urangnyo elok, ndak pernah bangih ka anak ketek, walaupun acok kanai sorak an. Ringan tangan untuak manolong amak amak nan barek mambao barang balanjo ka ateh bendi, di agiah pitih jadi, indak diagiah hatinyo sanang sajo. Banyak urang nan sayang ka inyo. Tiok hari ado sajo urang mambalikan nasi ramaih. Kalau manarimo nasi ramaih kapalonyo manggeleng geleng juo. Indak jauah dari tampek pakiah duduak, ado urang nan suko babaju lepis, pakai rompi, pakai sipatu bot. Kadang pakai camin mato reben, kadang indak. Topi koboy indak lupo, taruih ado di kapalonyo. Namonyo Buyuang, duduaknyo dakek lapau nasi ACC muko jam gadang. Indak banyak mangecek. Kalau hatinyo sadang ndak elok, sado urang ka di sipaknyo. Tapi kalau hatinyo sadang lasuah, acok tagalak, panyapo bagai. Wakatu tun, kami sadang manonton Datuak Dalu sadang manggaleh, kami suko mancaliak dek karano lucu. Sudah tu baraliah ka pakiah geleng, mandanga nyo balagu rabab. Kami indak tau aratinyo, tapi sanang mandanganyo. "Kiah... Pakiah... Tuka lah lagu, jan itu ka itu sajo. Lagu India bagai lah." Kami mampagarahkan pakiah geleng. "Hehehe... Den ndak pandai lagu India doh, kok lagu Mesir baa nyoh?" Tanyo pakiah sambia tagalak. "Lagi Japang bagai lah kok indak India." Kami taruih sajo mampagarahkan pakiah. Tibo tibo muko kami pucek, putiah tapak kaki kami. Buyuang Koboi mangamuak. Sagalo nan ado di hampehkannyo. "Hoi... Kalian ndak pai mangaji? Sia apak kalian? Main main sajo karajo kalian, pai mangaji capek!" Pakiak Buyuang Koboi sambia malambuik an kaleng roti ka labuah. "Preng... Brak... Bruk.." Urang nan datang ka pasa ateh abih cameh, tapi urang manggaleh tanang sajo, indak ado camehnyo doh. "Manga kalian caliak caliak den. Ado den mamintak ka kalian. Kalian bansaik, ma talok mambalikan aden pelo jo jaguang." Sorak Buyuang Koboi nan hobby makan pelo sarato jaguang abuih. Tibo tibo inyo tadiam, dan duduak bantuak kuciang dikaja jo lidi. Kapalonyo manakua, indak barani mancaliak ka urang nan tagak. "Hoi... Yuang, sakali lai ang marabo bantuak cako, den sate waang jo iko." Sambia ma acuangkan pisau dapua. Ruponyo si Manjo lah tibo di sinan tampek Buyuan Koboi mangamuak. Buyuang Koboi sabana takuik jo si Manjo, karano si Manjo acok mambaok pisau dapua. "Eeee Manjo. Kama sajo kau? Maaa jatah makan den?" Pakiah geleng mandakek ka si Manjo. Si Manjo capek maambiak sabungkuih nasi dari dalam tas nan di gantuangnyo di lihia. Mulailah pakiah geleng jo si Manjo makan nasi baduo, samantaro si Buyuang Koboi basiansua bajalan ka pasa lereang.

-kenangan anak Belpas-