Tantangan Hari ke 60

#TantanganGurusiana

Salamaik malam dunsanak kasadonyo. Baa kaba dunsanak malam ko, kan lai sihaik - sihaik sajo. Lah Sabtu lo hari kini ndak sanak, rasonyo baru kapatang wak basuo jo hari Sabtu, kini lah tibo lo nyo baliek. yo capek bana wakatu ko bajalan.

Tando-tando lah mulai tuo bumi ko. Mako dari itu banyak - banyak lah awak baibadah lai, jaan sibuk juo jo urusan dunie ko. kok ka di paturuik an indak ka sadang dek wakatu nan adoh ko do. 

Apo kegiatan sanak hari ko ?

kalau ambo dari pagi sampai malam ko lah batuka propesi. Hari Senin sampai Jumat jadi pejabat di Dinas Pendidikan, kalau Sabtu jo Akaik ko jadi pembokat alias pembantu.... hehehe

Pagi - pagi ambo lah masuak ka dapue, piriang tadi malam alun sempat babasuah lai, jadi itu nan ambo kakok dulu. Sambie mambasuah piriang, di puta juo lah kain ko. Itu lo sanangnyo manyasah pakai masin ko, bisa juo di kakok karajo nan lain.

Piriang alah barasiah, rumah lah basapu pulo, tingga manjamuan kain lai. Ambo angkek kain nan saembe tadi ka lua, untuak di jamua. Pas ka manjamua sarawa karajo uda sayang, tarasok agak gambuang di sakunyo. Ambo pareso lah saku-saku sarawa tu, dalam hati badoa mudah-mudahan lai dapek pitih gak sagepok, hehehe...

Ambok masuak an tangan ka dalam saku, tarasok karateh nan alah basah. langsuang ambo kalua an, taraaaa....

Nampak karateh bawarna sirah di ganggaman, ado limo halai. Ndak tangguang sanang hati mancalieknyo. Alhamdulillah, rasaki istri sholeha, pikia ambo.

Ambo jamua pitih tu di sandaran kuresi di ruang tamu bia kariang nyo. Ambo lanjuik an manjamua kain nan tingga tadi.

Kiro-kiro pukua duobaleh, lah salasai karajo rumah kasadonyo, nan samba alah masak pulo. Tingga manunggu ayang beb pulang sikola lai.

Ambo kumpuan pitih nan bajamua di kuresi tadi, lah kariang ruponyo. Beko ambo tingga mangecek an ka uda sayang kalau ambo dapek rasaki nomplok dari saku-saku sarawanyo. Ambo yakin pitih ko diagiah an ka ambo beko tu.

Kiro - kiro pukua tigo, pulang lah uda ko dari sikola. Siap makan ambo caritoanlah kalau ambo basuo pitih di saku sarawanyo katiko manyasah tadi.

"Ambiak se lah dek Adiak pitih tu," kato uda.

"Iyo da, tarimo kasih yo da, Adiak makin sayang ka Uda." Langsuang ambo paluak uda sambie galak manih.

Samo - samo Diak, itu kan pitih Adiak nan batompangkan ka Uda patang," jawek uda sambie galak.

Handeehhh....baru ingek ambo, ruponyo iko pitih nan ambo tumpangan ka uda patang.

Ndak jadi dapek rasaki nomplok do... hik hik hik

Sagitu se caritonyo dulu yo sanak, ko mato lah padiah dek manahan kantuak. Gara-gara gurusiana manggok, tapaso malam-malam bakirim tulisan ko. Tapi Alhamdulillah lah bisa masuak, lai indak jadi ambo tajun bebas di hari ka anam puluah ko do.....

#TantanganGurusiana60

Rumahku, 14 Maret 2020