Oleh : Efi Sufiah

Asti langsung muru kelas. Di kelas barudak geus rempeg, raeng ngarucap salam, Asti ngajawab bari imut maur. Ku lalucu barudak, siga nu bisa maca hate Asti nu keur tagiwur, ih dialajar teh mani daria. Sabot barudak ngerjakeun tugas mandiri, Asti bisa reureuh diuk, leng ngahuleng, kunaon tadi bet hayang ngalieuk kana meja TV. Asti nempo aya surat undangan nu keur ka manehna. Ku Asti dicokot, bari ngaliwat, sup diasupkeun kana tas, geus dina beca kakara dibaca, geuning surat ondangan teh ti Faisal.

“Wilujeng enjing” galindeng Sunda logat urang sebrang. Saban isuk teuteupna liuh anteb nembongkeun kanyaahna, saules imut nu biasa nentremkeun hate Asti, geus sataun leungit tina hirup Asti. Ayeuna bet nembongan deui. Teu karasa leungeun Asti nungkup panon, nutup ceuli, hayang ngaleungitkeun eta dedengean. Aya nu nyelekit juru-eun dada, tikoro beurat , tapi cipanon teu bisa kaluar , nyedek dina genggerong. “Pan aing teh geus ikhlas “ ceuk gerentes hate Asti. Faisal anak hiji-hijina, kolotna geus sepuh. Beres kuliah Faisal balik ka kampungna hayang ngurus kolot bari ngawangun desana. Asti teu diijinan ku indungna ngumbara nyebrang pulo. Duanana geus paheut, silih ikhlaskeun, mun enya takdir Allah kudu ngajodo, pasti aya jalanna. Maranehna sadar, ngaraheutan hate nu jadi indung bapa, matak jadi cucuk keur hirup maranehna kahareup.

Bari ngarenghap panjang, Asti istigfar ngusap beungeut. Asup ka kelas nu lain, Asti sadar, teu meunang mawa rereged hirup di hareupeun barudak. Balik ka imah, ngonci panto kamar. Indungna gegedor, meureun kadange Asti ceurik. Bari inghak-inghakan mikeun surat ondangan ka indungna.” Naha si Ical nu kawin , Asti nu ceurik ?” ceuk indungna. Surat ondangan ku Asti direbut ti leungeun indungna. Ditengetan enya nu kawin teh Hapsari Dewi jeung M. Faisal Hamid, lain Faisal Hamidi. Ari Ical teh babaturan ulin keur budak, anak sobat indungna, Asti teu apal ngaranna Faisal. Heuleut 5 bulan, surat ondangan teh ayeuna mah ngaran manehna, Asti Prawesti jeung Faisal Hamidi. Wilujeng enjing , ngagalindeng deui saban isuk, teu jauh ti ceuli Asti.

Bintang Bali, 6 Februari 2022