Tantangan menulis hari ke 30

#TantanganGurusiana

Kuciang Aie

Upiak Rubiyah tamanuang surang diri dikamarnyo. Di tapi jandela upiak mamandang ka langik nan tenggi. Hari sangaiklah ka rancaknyo. Langik tampak biru, awan putiah baarak diambuih angin, malayang-layang sarupo kapeh tabang.

Panek mamandang ka langik tenggi, pancaliakan upiak bapindah ka jalan raya. Nampak oto jo onda saliang bapacu dek samo-samo takaja. Oto nan sinyak sibuak mangalason, nan onda nyo acuah je nyo. Tapaso oto mangalah dek nyo sasak an dek onda. Mancaliak pamandangan nan sarupo iko, mambuek Upiak lupo sabanta jo masalahnyo.

Upiak mahiruik udaro sapanuah-panuanh paru-parunyo. Sudah tu nyo lapehan lambek-lambek. Karajo nan sarupo iko baulang-ulang dikarajoannyo. Namun nan dadonyo masih taraso padek juo. Upiak mancapak, taraso suliek maambiek kaputusan. Apo lai iko masalah masa depan. Salah piliah bisa manyasa saumua hiduik. Duo pemuda dalam waktu nan samo malamarnyo, dan upiak harus mamiliah ciek antaro duo.

Tigo hari nan lalu si Katik, rang bujang manggaleh kain kuliliang kampuang malamarnyo. Katik ko kanai hati bana ka Upiak Rubiyah. Bisa maklumi. Upiak ko iyo rancak. Indak ado saingan rancaknyo jo gadih-gadih nan ado di kampuangnyo. Apo lai upiak ko anak urang kayo. Sadoalahan ado jo upiak ko. Bak kecek urang, samparono bana hiduik Upiak Rubiyah. Indak ado nan kurang dalam hiduiknyo

Upiak mancaliek jam nan tagayuik di dindiang. Hatinyo alun juo tanang. Beko malam si Sharip ka datang pulo ka rumahnyo ka maminta jawaban. Upiak iyo suko pulo ka Sharip ko. Urangnyo gagah, alah bakarajo tatap, pai karajo jo oto sedan bakilek. Rugi pulo upiak ka manulak lamaranyo. Apo lai gadih-hadih di kampuangnyo banyak nan suko ka Sharip ko.

Dek panik sia nan ka dipiliah, upiak maambiak ondanyo. Upiak pai mambao ondanyo ka arah pantai. Sapuluah minik ondanyo alah tibo di tapi pantai Padang. Upiak bajalan ba main ombak di sapanjang pantai. Kakinyo nan talanjang sakali-sakali disapu dek ombak nan mahampeh ka tapi.

Antaro ndak sangajo matonyo manangkok pandangan nan tak lazim dicaliak. Sharip nan sadang manunggu janji Upiak, kironyo kini duduak bamesraan baduo jo gadih lain. Upiak tahanyak ka pasie putiah. Upiak taduduk surang diri. kironya Sharip alah bapunyo. Iyo sabana kuciang aie si Sharip ko. Upiak dilamarnyo, tapi nyo bamain api jo urang lain.

Batin upiak lega. Kini pikiran Upiak tatuju ka Katik surang lai. Apokah ditarimo pinangannyo atau indak. Tapi upiak iyo agak ragu juo samo si Katik. dek karajo Katik hanyo manggaleh kain kuliliang kampuang, indak bakarajo di kantua sarupo Sharip. Tapi Katik banyak pitih.

Upiak taruih makangkah manuju pantai puruih sambie malamun. Pikirannyo kini fokus ka Katik. Tak lamo upiak mambiak kaputusan, Upiak ka manarimo lamaran Katik. Sadang manimang-nimang ka mambiek kaputusan, antah manga matonyo tacaliak ka tenda nan bawarna orange. Di bawah tenda Katik sadang mamadu kasiah jo padusi nan lain. Tampak tangan Katik sadang mamacik mesra ka padusi nan duduk disampiangnyo.

“Tuhan, tarimo kasih. Alah bacaliak an kasadonyo. Kironyo indak ado nan elok untuak ka diambiak jadi imam. Kironyo kaduo e samo-samo kuciang aie.”

Upiak malangkah katampek ondanyo. Jo hati lapang upiak pulang karumahnyo. Hari kiniko alah dapek kaputusan Upiak, untuak manulak lamaran kaduonyo.

Bak Pepatah :

Maminteh sabalun hanyuik, malantai sabalun lapuak

ingek-ingek sabalun kanai

Padang Beloved City. 30 januari 2022