Zaman lah Barubah

Oleh: Fitri Anora

Zaman lah barubah. Banyak hal nan dulu ado, kini lah hilang. Contohnyo raso Malu. Dahulu malu ko banyak dimiliki dek urang. Malu kalau surang padusi pai baduo jo laki-laki. Kini ndak baitu lai. Anak gadih sanang sajo hatinyo babonceng jo kawan laki-laki. Gayanyo sarupo urang laki bini sajo. Bahkan labiah pulo. Urang nan mancaliak pun lah biaso sajo. Padohal itu talarang di agamo kito. Dulu pantang padusi batandang ka rumah kawan laki-laki. Kini ndak malu lai gadih pai ka rumah cowok. Batamu jo mande nan laki-laki, calon mertua (camer) katonyo. Ondeh, awak nan sagan mandanganyo.

Zaman lah barubah. Nan dulunyo biaso, kini ndak biaso lai. Dahulu biaso sajo surang mamak atau urang tuo menegur anak kemenakan nan babuek sumbang.

"Indak elok laku takah itu. Ubah lah," kato nan tuo maagiah nasihat.

Urang tuo si anak nan ditegur, maraso batarimo kasih karano anaknyo alah disapo parangainyo. Tapi itu dulu. Kini jan cubo-cubo manyapo laku anak urang. Berang amak jo apaknyo.

"Urus se lah anak awak. Anak urang jan diurus lo," baitu katonyo.

Zaman lah barubah. Dahulu jodoh dicarikan urang tuo. Anak kini pandai mancari jodoh surang. Urang tuo tingga satuju sajo.

"Ma, Pa, kami lah sasuai baduo. Kami nak nikah, " kato si anak.

Katuju di anak, urang tuo pun satuju pulo. Urang tuo picayo sajo ka pilihan anaknyo.

Memang indak sadonyo sarupo itu. Masih ado nan bamalu dalam diri. Manjago laku jo parangai. Masih ado nan amuah di tegur sapo parangainyo dek mamak atau inyiak jo angku. Soal jodoh baitu pulo. Masih banyak nan lai ateh campua tangan urang tuo. Mamakai pertimbangan elok buruak dari keluarga.

Tapi nan takah itu jumlahnyo alah samakin langka. Kini lah banyak nan barubah. Ndak disadari lah hilang sajo raso malu. Kebiasaan atau tradisi baiak nan dulu ado di masyarakat, kini antah ka ma painyo. Apolah nan bisa dipabuek kini? ***

Rumahku, 20 Maret 2022