Ramadan Pangabisan

Alhamdulillah, kito basuo jo Ramadan baliak. Bulan yang penuh rahmat dan ampunan. Kito dapek kesempatan baibadah nan diganjar pahalo balipek ganda.

Kok lai manampuah Ramadan jo keimanan dan mengharap ridho Allah, tantu kito tamasuak urang nan maraih kemenangan di 1 Syawal nanti.

Acok kito mandanga ustadz baceramah, nan mangatokan, " isilah Ramadan jo keimanan dan ibadah sebaik mungkin. Anggaplah Iko Ramadan Terakhir awak."

Kok awak paratian itu memang batua. Bara banyaknyo saudara awak nan lah bapulang dalam tahun balakang ko. Indak dapek nyo basuo jo Ramadan kini ko. Berarti Ramadan tahun kapatang tu adolah Ramadan terakhirnyo.

Baitu pulo kito kini. Indak dapek ditakok sia nan ka dipanggia Allah di tahun dimuko. Kalau kito tamasuak di dalamnyo, berarti kini lah Ramadan pangabisan awak. Ikolah kesempatan terbaik awak untuk mandapek an ampunan Allah. Sahinggo di hari rayo nanti kito bisa sarupo bayi baru lahia nan suci dari doso. Insyaallah. Aamiin. Marugilah siapo nan manyio-nyiokan Ramadan balalu baitu sajo. ***

MP, 3 April 2022