#Tantangan gurusiana#

Tantangan hari ke 24

Aa...Tu Mak?(2)

Sajak samalam iyo indak baranti- baranti hujan turun doh. Co dicurahan dari ateh langik, mandarun bunyinyo jatuah di ateh atok. Udaro iyo sabana dingin, mancucuak sampai ka tulang dinginnyo. Kilek jo patuih sambuang manyambuang. Eee...tibo-tibo lampu pudue pulo. "Lengkap sudah penderitaanku", baitu istilah urang kini.

Nak jan bakalam-kalam se, amak iduik an lah lampu togok. Lampu nan indak ado duonyo, karano yo ciek tu nan ado nyoh, he...he. Sudah tu amak pai baudhuak, salasai sumbayang jo bado'a amak langsuang lalok bakalumun.

Kriiiing....tasintak amak dek bunyi beker. Beker ko iyo sangajo amak setel bunyinyo untuak manjagoan sumbayang subuah. Kok indak talambek amak jago, apolai hari dingin-dingin co kini, tambah lamak lalok dibueknyo.

Mandanga bunyi beker langsuang amak bukak incek mato. Eee....kironyo kalam sakuliliang. Kironyo lampu togok tadi lah mati, lah abih minyaknyo.

Tapasolah amak maresek -resek bajalan ka sumua pai baudhuak. Katiko hari lah tarang anak amak baciloteh, "aa...tu mak?" "Apoo...?" Langsuang amak batanyo. "Tuuu...di muko amak...". Langsuang amak masuak biliak bacamin, ndeeeh ruponyo muko amak lah bacilumu dek jalago lampu togok. Nasib....nasib.

(Ketika listrik mati kita terpaksa menggunakan lampu teplok, yang sering menghasilkan jelaga berwarna hitam. Apabila kita tidur di dekat lampu, maka keesokan harinya muka kita akan berwarna hitam karena jelaga)