Wakatu ashar alah baransua lapeh. Sabanta lai tibo lo wakatu magrib, wakatu untuak babuko. Di dapua indak ado nan ka di masak. Kok kadibali ka lapau pambalinyo tu bana nan indak ado.

Sajak ado wabahko pandapatan si upiak sabana jauah manurun. Biasonyo upiak manggaleh kue-kue jo gulo-gulo, atau makanan ringan nan katuju dek anak-anak. Dek ado wabah panyakikko buliah dikecekan indak ado anak ketek nan balanjo do. Sabab anak-anak tu ditagahan dek urang gaeknyo kalua rumah, takuik beko kok tatula lo dek panyakik tu.

Hari kini jan kan untuak pambali bareh. Untuak pambali mie sabungkuih indak ado doh. Sabab indak ado jua bali sajak pagi.

Si upiak lah tabik manuang. Jo a inyo sakaluarga ka babuko. Nan jadi pikiran bana anaknyo nan kelas 2 SD. Sajak subuah dek manahan, tibo wakatu babuko indak ado pulo nan ka dimakan. Ka babuko jo aie se tu ndak mungkin doh. Kok ambo jo apaknyo ndak baa do pikia si upiak.

Upiak bajalan ka balakang bapikia jo mancari a nan ka bisa dimasak. Di balakang rumah tu upiak ado mananam sayua kalidi jo pucuak ubi sagalo saketek.

Mancaliak batang ubi, tagaraklah hati upiak mancubo mambongka ubi tu. Untuang-untuang babuah, bisa untuak babuko beko.

Alhamdulillah....kironyo ubi tu lai babuah walaupun ketek-ketek. Basugiro Upiak mangubak jo maabuih ubi. Magrib beko anak Upiak lai bisa babuko jo ubi abuih sajo. Tarimokasih ya Allah...bisa babuko jo abuih ubi sanjo ko.