"Bak balakang aienyo lah saketek, bak biliak tangah ndak barisi, kok mati se aie cubo lah dek kalian", Mak Malin mambirotok surang sambia bajalan ka muko ka balakang. Dek mandanga Mak Malin mambirutok surang langsuang tek Bibah manjawek "lai ka denai barasiahan bak tu, denai nak mangaji sahalaman dulu", sambia malatakan Qur'an ka ateh meja dari tangannyo. Sudah tu bajalan ka balakang maambiak sapu jo kunci inggris untuak mambukak sumbek bak untuak mambarasiahan bak tangah.Bak tangah jo bak balakang iyo indak nyo isi dek tek Bibah do, sabab alah banyak dadak aienyo. Tek Bibah barancana ka mambarasiahannyo. Salain lah badadak alah banyak pulo jantiak-jantiak dalam bak tu. Kini lah musim paneh, biasonyo panyakik damam badarah suko bajangkik di musimko.

Lah barasiah bak tangah tek Bibah pindah ka balakang untuak mambarasiahan bak balakang. Sambia mambarasiahan bak nyo puta masin cuci dek tek Bibah. Tangguang-tangguang basah, bialah kuyuik bana batin tek Bibah. Jam satangah sabaleh malam salasailah karajo tek Bibah. Duo buah bak lah barasiah dan lah diisi aie. Kain lah dijamua pulo. Tapi tek Bibah dapek bonus....diguncang kuro dek kadinginan.

Nan Mak Malin sudah baturo-turo dan lah nampak deknyo tek Bibah bakarajo. Mak Malin lalok bagaluang sambia bakaruah. Ndak tantu deknyo baso tek Bibah lah dek rindin diguncang kuro.

Sabana sadiah hati tek Bibah. Dari pagi sampai malam bakureh, ndak bisa istirahat. Apolai tek Bibah indak mudo lai, alah kapalo limo. Kok dulu iyo...pulang bakureh dari sawah urang, tibo di rumah nyo halau sado karajo dek tek Bibah. Lah lalok se mangko baranti. "Uda...denaiko manusia...indak robot", batin tek Bibah dalam hati.