Talua Angek-angek

Saminggu ko karajo amak pai mangampas talua puyuah jo apak. Minantu amak bataranak puyuah di rumah. Biasonyo talua ko dibaok se dek Si Ujang tampek biaso mambali makanan puyuahko. Wakatu inyo maantaan makanan puyuah nyo baok lo talua puyuah wak sakali. Bara tonggak talua nan nyo baok, bara pulo makanan nsn awak mintak catat se dulu. Beko sakali sabulan dietong, bara awak ka manjujuik labia bali makan tu. Aaa...sabanyak itu lo lah pitih balanjo wak dari hasil maabehan puyuah dalam bulan tu.

Sajak PSBB minantu amak nyo karajo dari rumah "work from home" bahaso kerennyo,  indak masuak kantua doh. Tabukak lo lah pangananyo untuak mampromosikan talua puyuahnyo ko malalui WAG. Nan amak sato lo sakaki, amak masuakan lo ka WAG amak. Amak buek dalam WAG "untuak induak-induak nan maleh pai ka Pasa dek PSBB bisa pasan talua puyuah ka amak, Rp.25.000/lapiak. Antar alamat jo bebas ongkir".

Alhamdulillah, mungkin dek lai rasaki cucu nan kini. Lai banyak nan mamasan. Sahinggo indak bisa minantu jo anak amak se nan pai bajojo doh. Turun tanganlah amak jo apak maantaan talua ko ka rumah kawan-kawan. 

Ka patangko amak buek baru promosi ko di WAG,"induak-induak nan ka pasan talua puyuah angek-angek tolong agiah kaba yo". Masuaklah pesan di WAG tu dari kawan amak,"Za, pasan Uni salapiak, tapi nan matah yo". Sudah tu amak jaweklah pasan uni tadi"Uni, talua angek-angek baru tapanca".😃😃😃

"Oooo....kecek uni talua lah baauih...."😃😃😃🤭