“Dek sangko buruak, rasoki tailak ”

                Sanjo itu, sabuah oto kijang baronti di tapi lawuik menikmati pemandangan ditapi pantai Padang. Oto parkir disampaiang urang manggaleh sate jo karambia mudo. Sapuluah panumpang turun, nan surang masih duduak dikursi sabalah supir. Nan turun langsung manuju ka tapi pantai mancari lokasi nan pas untuak selfi atau foto keluarga. Tau-tau  urang manggaleh barunguik-runguik “ parkir dakek kadai urang tapi ndak mambali!  “ masyaallah. Sagitu buruaknyo sangko rang manggaleh tu. Padahal, setelah menikmati pemandangan ditapi pantai,  rencananyo baru makan sate sambia minum karambia mudo. Tapi karano  suasano ndak lamak lai mako di putuihkan pindah parkir sajo.

                Akhirnyo, dek buruak sangko,  rasoki tailak. Harusnyo, urang manggaleh nampak calon pambali, langsuang baramah tamah manawarkan dagangannyo. Bukan malah baburuak sangko urang turun oto indak balanjo. Ndak mungkinlah urang pai raun indak balanjo. Tapi seandainyo urang manggaleh tu indak barunguik-runguik sarupo itu, mungkin urang balanjo di kadainyo.

                Kalau pun urang indak balanjo di kadai awak, bukankah jo ramah-tamah akan mambari kesan rancak dan menyenangkan para wisatawan baiak lokal maupun internasional. Bahkan mungkin dek silaturrahmi tasambuang, banyak pendatang jadi dunsanak di daerah baru.