“ Laku buruak nan paralu dirubah “

Oi nak kanduang nan buruak laku, dangakan malah mande bapasan

Ubahlah laku buruak jadi elok laku, buliah nak sayang urang ka awak

Rahmat turun, kasiah pun tibo, usah dibuek urang marabo

Ikolah diantaro laku buruak nan paralu diubah!

Usah payah dijagokan pagi, apo lai marengek pulo

Biasokan mandiri jago pagi, usah marengek, sugirolah shalat subuah

Usah payah disuruah sarapan pagi, sabab itu untuak kebaikan awak juo

Awak sadang dalam pertumbuhan, butuh makanan sehat jo pola hidup sehat

Usah payah disuruah mangarajoan tugas rumah, malalaikan waktu

Biasokanlah pandai mambagi waktu, bilo waktu main, istirahat jo tugas

Usah biasokan manggunokan kato tunggu kalau diimbau atau disuruah

Sugirolah panuhi panggilan urang tuo, karajokan sugiro parintah guru

Usah abaikan peringatan urang tuo, sabab dibaliak peringatan, ado akibat mangabaikannyo

Usah payah disuruah mangaji, sabab al Qur’an adolah pedoman hidup

Ba a ka mangamalkannyo, kalau sekedar barajo mambaco sajo enggan, apo lai mamahaminyo

Usah biasokan cadiak buruak, tapi biasokanlah babudi baiak

Muluik manih kucindan murah, pandai manam tabu di bibia

Capek kaki, ringan tangan, capek kaki indak manyipak, ringan tangan indak mamacah

nan tuo dihormati, samo gadang bao bakawan, Nan ketek disayangi

Waktu ketek taraja-raja, lah gadang tabao-bao, lah tuo tarubah tido

Kalau waktu ketek biaso buruak laku, samakin gadang payah mmarubahnyo

Mako katiko lai masih ketek ko, ubahlah buruak laku tu buliah nak sayang urang ka awak