“ Mampaduoi induak ayam”

Menjadi anggota koperasi … ibarat mampaduoi induak ayam. Harapan urang nan punyo induak ayam, tantu induak ayam dipaliharo elok-elok dan upah untuak nan mamaliharo adolah hasil nyo dibagi duo. Kok rato-rato ayam baranak 10 ikua mako upah untuak nan mamaliharo 5 ikua. Anak ayam na limo ikua jatah rang punyo ayam bisa bakambang pulo baranak pinak. Kaduo balah pihak mandapek keuntungan. Seandainyo nan punyo induak ayam taragak manengok induak ayamnyo, atau sekalian mamintak ayamnyo baliak, mako nan tukang paliharo indak ado hak manahannyo.

Nan tajadi kini, induak ayam indak tabaranak sasuai kebiasaannyo. Taluanyo sajo hanyo sekitar 2-3 butir sajo. Samantaro biaya bali makanannyo semakin mambangkak. Mako talua dijua untuak pambali sentrat, dadak jo bareh. Bahkan induak ayam pun digerogoti panyakik ( dek ulek). Mako produktifitasnyo samakin menurun. Mako apo nan kadiarok dek nan punyo induak ayam? Bahkan katiko taragak nak manengok induak ayam, kecek nan mamaliharo induak ayam sadang batandang ka kandang sabalah. Dan katiko nan punyo ayam mintak induak ayam dipulangkan sajo, nan mamaliharo manjawab tunggu dulu, ayam sadang tagadai untuak pambali ubek ayam.

Kalau ingin karajo samo mampaduoi induak ayam taruih balanjuik, mako harus ado gebrakan supayo induak ayam sehat, produktifitasnyo maningkek dan hasihnyo bisa dinikmati basamo. Diantaronyo, jago kesehatan induak ayam, tekan biaya hidup jo caro kurangi mambali sentrat nan haragonyo lumayan maha, agia sajo makan ala kadarnyo yang penting jan bakalabihan. Lapehkan induak ayam supayo nyo bisa mangakeh mancari makan, usah dikuruang sarupo ayam buras nan tak pandai mangakeh. Ndak diagia makan samo sakali tantu tak mungkin. Ado paho tantu ado kaki, ado usaho tantu ado rasaki.