“Tali darah takkan pernah putuih walau bumi baranti baputa”

Tali darah takkan pernah putuih walau bumi baranti baputa, tapi tali kasiah sayang kok indak disambuang iyo bisa putuih. Banyak alasan kok dicari kajadi sababnyo. Salah kecekla, undangan tak dipanuhi, kandak tak balaku atau bisa juo dek asuang siasa pintanah pihak katigo. Hinggo namuah bakarek rotan antaro adiak jo kakak, urang sumando jo mamak rumah, atau sanak satali darah, bahkan anak jo urang tuo.

Kok dirantang masalah namuahnyo panjang, elok dipunta nak nyo singkek. Masalah gadang dipaketek, masalah ketek disalasaikan sajo jo saliang mamaafkan. Nan lalu bialah balalu, mari buka lembaran baru. Tatap maso depan nan labiah cerah. Bayangkan indahnyo perdamaian, keakraban, persatuan, barek samo dipikua, ringan samo dijinjiang. Sakik sanang samo diraso. Abaikan perbedaan nan ado diantaro kito. Jadikan peluang untuak saliang mengisi dan melengkapi sasamo.

Disetiap kesempatan bisa bakumpua, sisiah waktu untuak saliang batamu. Tinggakan dulu kesibukan nan sabalik pinggang. Karajo kok jadi alasan ndak kabakasudahan kalau indak disudahi dulu. Pandai-pandai mambagi waktu. Mano waktu untuak bakureh, mano waktu untuak saliang basilaturrahmi. Apolai dihari bayaiak bulan baiak. Yakinlah silaturrahmi bisa mamanjangkan umua jo manambah rasaki dan keberkahan hiduik. Jago jan sampai tali silaturrahmi taputuih. Arekkan jo saliang sapo, saliang salam, saliang senyum dan saliang peduli antaro sasamo. Pandai ma agak magiahkan. Latakkan sesuatu ditampeknyo. Semoga Allah memberkati. Aamiin!