Tantangan Hari ke -165

#TantanganGurusiana

#Tantangan Menuju 365 Hari

Halloo bundoooo,,suo kito baliak di dapua Upiak. Kali ko Upiak babagi resep cara mambuek bakso. Mumpung hari Rayo Kurban dak bara hari lai, jadi para bundo-bundo tacinto bisa marancang sabagain dagiang kurbannyo untuk dibuek makanan kasukaan anak-anak dan kaluarganyo.

Bahan-bahannyo:

1. Dagiang ½ Kg

2. Bawang Putiah 5 siung

3. Ladaku 2 sdm

4. Beking Royal 1 sdm

5. Tapuang Tapioka ¼ Kg

6. Minyak Manih 4 sdm

7. Batu Es

8. Garam sacukuiknyo

Caro mambuek

Dagiang dicincang-cincang, taruiah di blender sampai haluih. Masuk an bawang putiah yang lah digiliang, minyak manih, ladaku, beking royal jo garam, sado bahanko diblender. Kalau lah haluiah dagiang dan lah manyatu bahan-bahan tu matian blender, tuang ka baskom taruiah masuk an tapuang tapioka saketek saketek, sampai dagiang bakso bisa dicetak. Kalau lah pas bakso siap dicetak pakai sendok jo kepalan di tangan.

Kalau lah siap dicetak, abuaih bakso jo aia manggalagak. Bakso nan tarapuang kateh berarti lah masak. Bakso nan lah masak, dibangkik siaptu masuk an ka baskom nan baisi batu es. Padian dirandam dulu sakitar 10 minik.

Siap dirandam jo batu es, bakso siap dimakan. Labiah lamak kalau dibuek an kuah sup pakai mie hun, dan tambah saos jo kecap. Bakso bisa lo dijadian untuk pancampua sayua bungo lomak, atau bakso nyo bisa lo ditusuak, taruiah dibaka agiah kecap. Pasti anak-anak pado suko.

Salamaik mancubo bundo-bundo,,mudah-mudahan baguno resep nan Upiak bagianko.

Solok, 26 Juli 2020