Tantangan Hari ke -144

#TantanganGurusiana

#Tantangan Menuju 365 Hari

Haaiii dunsanak yang hobi kuliner, kini ko basuo kito baliak di dapua upiak. Hari ko upiak ka babagi resep untuk mambuek salah satu cemilan dari Pariaman, namonyo sala lauak . Makanan nan banyak kito tamui disapanjang pantai Gandoriyah Pariaman ko untuk oleh-oleh kalau lah baliak rekreasi dari sinan.

Kali ko upiak ka babagi resepnyo bia dak jauah-jauah lai mancari ka pariaman, lumayan buek makanan ringan untuak sakaluarga. Adopun bahan-bahan nan kito paraluan adolah :

Sabungkuiah tapuang bareh rose brand

2 sendok lado giliang

6 buah bawang merah

6 buah bawang putiah

Sapadeh

Langkueh

Kunyik

Daun kunyik di irih haluiah-haluiah

Sabatang bawang Perai

1 ons Ikan asin

Penyedap sacukuiaknyo

Garam sacukuiaknyo

4 galeh aia

Caro mambueknyo :

Tapuang barehnyo di randang sakitar 5 minik.

Salanjuiaknyo kasadoan bumbu-bumbu tadi digiliang, tamasuak ikan asin. Lah siap digiliang abuiah samo aia, langsung masuk an daun kunyik yang lah ba irih tadi, jo bawang perainyo sakalian. Jan lupo garam samo penyedapnyo. Abuiah sampai manggalagak, dan jan lupo kicok garamnyo.

Kok lah manggalagak, masuk an aia tu ka tapuang yang lah siap barandang tadi. Kacau taruiah sampai taaduk kasadonyo. Kalau lah taaduk, padian adukan tu dingin agak satangah jam. Kalau lah dingin, bulek-bulek an jo tangan pakai plastik nan diagiah minyak manih saketek, bia murah mambantuak sala tu.

Lah siap dibulekan, goreng sala jo api nan sadang-sadang sajo, bia masak sampai ka dalam. Lah siap di goreng sala lauak siap disajikan.

Salamaiak mancubo yo dunsanak,

Mudah-mudahan bamamfaat.

Solok, 05 Juli 2020