#TantanganGurusiana

.

Mak Toraik adolah sorang laki-laki nan paliang kayo di kampuangnyo. Hasil sawah jo ladang nan malimpah mambuek Mak Toraik kayo rayo. Sifaik Mak Toraik nan himaik cenderung simpilik kariang alias panceke mambuek harato Mak Toraik ndak pernah habih.

Kamegahan kota Jakarta di Tanah Jawo alah lamo manarik hati Mak Toraik. Alah lamo inyo punyo kainginan nio pai jalan-jalan kasitu. Carito-carito urang yang pulang rantau manambah kainginannyo nio pai ka Tanah Jawo batambah kuaik.

Pado hari yang ditantukan barangkeklah Mak Toraik ka Tanah Jawo. Dek Mak Toraik takuik naiak kapatabang di bali e kuricih kapa lauik.

Kapa lauik yang kamambawok Mak Toraik ka Tanah Jawo kapa yang sangaik gadang, kapa mewah. Saumua hiduik baru sakali ko Mak Toraik naik kapa sagadang ko.

Sasampai di kapa anak buah kapa mampasilahkan Mak Toraik naiak. Dek Mak Toraik mambali kuricih yang paling maha, Mak Toraik diagiah kamar yang paliang rancak di kapa tu.

Dengan sanang hati masuaklah Mak Toraik ka dalam kamar. Kamar untuak Mak Toraik batua-batua mambuek Mak Toraik kagum sakagum-kagume. Dek panek pajalanan dari kampuang ka Taluak Bayua Mak Toraik tatidua di ateh kasua yang lambuak.

Sanjo hari Mak Toraik tajago paruik e mamakiak-makiak dek lapa. Mak Toraik pai kaluo batanyo ka anak buah kapa dima tampek makan. Anak buah kapa maantaan Mak Toraik makan ka restoran kapa. Makanan yang lamak-lamak mambuek Mak Toraik basumangaik makan. Antah alah bara kali nyo batambuah dari tadi. Alah kanyang paruik Mak Toraik baliak ka kamarnyo.

Sasampai di kamar Mak Toraik takantuak. Paruik kanyang mato mangantuak. Ndak dapek aka lai, Mak toraik mambawok lalok baden nyo di kasua nan lambuak baliak. Mak Toraik mayambuang lalok e nan tadi.

Bisuak pagi e, Mak Taroik tajago. Paruik nyo yang diisi kanyang malam tadi minta di kalua an. Pailah Mak Toraik ka kamar madi nan ado di dalam kamar e. Di bukek e pintu kamar mandi, nan nampak cuma bak aie jo keran. Mak Toraik binguang nyo ndak tahu nan ma tampek buang aie gadang. Paruik e malilik minta dikaluaan. Mak Toraik jadi panik. Ba a ka ko, kecek Mak Toraik

Mak Toraik lari kalua kamar ka batanyo, dek suasana masih pagi kapa langang ndak ado urang ka tampek batanyo. Tibo-tibo mato Mak Toraik maliek ado bantuak lubang ketek di dindiang kapa. Mak Toraik bapikia, bisa lah nyo buang aie gadang disitu, karano jatuah nyo kan kalauik beko, jadi bisa dimakan lauk.

Tanpa bapikia panjang lai, Mak Toraik mandorong jendela ketek tu. Mak Toraik mayonggiang di situ, dikaluan nyo sagalo yang mambuek sakik paruiknyo. Mak Toraik lega bukan main. Tagageh nyo pai kamar mandi mambasuah. Wakatu mambasuah barulah nampak dek Mak Toraik ado kakuih duduk di situ. Ondeh... alah panek waden mancari dari tadi siko waang kiro e, kato Mak Toraik sambia manyipak kakuih tu.

Buang aie gadang yang dibuang Mak toraik tadi kiro e ndak jatuh ka aie lauik, kiro e jatuah ka dermaga di pelabuahan. Mak Toraik salah manduga kiro e. Disangko e sisi lubang ketek tu jatuah ka aie lauik. Kiro indak.

Wakatu Mak Toraik buang aie gadang dibawah lewat sorang petugaih palabuahan sadang patroli. Buang aie gadang Mak Toraik jatuah pas di kapalo patugaih tu. Petugaih tu mancaliak ka ateh. Patugaih tu baanggapan ado urang yang malempar e jo buang aie gadang. Nampak dek e sakileh ciri-ciri urang tu.

Satalah mambarasiah kapalo e nan kanai buang aie gadang tadi, dengan begang nan taramaik sangaik naiaklah patugaih tu ka ateh kapa. Di cari e lah urang nan alah melempar nyo jo buang aie gadang tu. Alah hampie saluruh panumpang kapa nyo caliak tapi ndak basobok. Karano ciri-ciri nan nan nampak dek patugaih tu ndak cocok jo ciri-ciri panumpang.

Patugaih manyabuek kan ciri-ciri urang nan malempar e jo buang aie gadang tu adolah sabagai barikuik “hiduang e mancuang, pakai kumih, pipi e karipuik” . Ndak ado urang yang sarupo jo ciri-ciri tu di kapa. Alah panek mancari ndak basobok. Dek indak basobok patugaih tu turun dari kapa. Patugaih patroli pelabuhan heran sangaik, sia lah nan malempar e... apo buang aie ko turun dari langik pikie e.

.

.

Ayo pembaca ada yang tahu nggak kenapa tidak jumpa orang-orang dengan ciri-ciri yang disebutkan petugas pelabuhan ? He...He...

.

Tamaik

Dumai. 26-04-2020