Tantangan Menulis hari 35 (#tantangan gurusiana)

Ranah minang tanamo dengan kuliner randang. Jikok bakaba tantang randang yang tabayang adolah randang dagiang atau bageser saketek ka randang ayam.

Padohal di minang sajak zaman dahulu kala banyak macam bahan yang dirandang urang. Sagalo ka dirandang. Tarutamo di kampuang ambo, ado randang paru, randang hati, randang talua, randang ubi pakai maco, randang daun kayu pakai baluik masiak, randang cubadak jo maco, dan lain-lain. Pokoknyo banyak macam bahan dibuek karandang.

Kini memang jamannya serba simpel dan praktis. Mamasak randang ko yo agak ribet dan lamo basangai-sangai jo api ketek. Jikok nio randang yang sabana randang mamasaknyo jo tungku kayu.

Santannyo banyak, bumbu rempahnyo juo banyak macam. Kini banyak urang, taragak jo randang tingga mambali sajo.

Ado juo eloknyo, tabuka mato pancaharian urang kampuang ambo, yaitu usaho mambuek dan manjua beraneka ragam randang.

Usaho iko kini sadang punyo prospek cerah. Karano pelanggannyo mulai dari ibu rumah tangga untuk samba pakawan nasi sahari-sahari, untuak di kirim ka dunsanak di rantau, atau untuak oleh-oleh buah tangan.

Jikok ado dunsanak pambaco pai ka ranah minang jan lupo mambali randang. Dijamin lamak sarato gurih. Sakali mancubo, minta tambah. Ndak picayo? Mari kito buktikan...

Lubuak Simato, 11 April 2020.