Taragak jo lapek sagan lah lamo. Pernah barencana kamambuek, pisang jo sipuluik lah ado. Tingga karambai lai, pai lah kawan ka kadai mambali karambai. Pasan ambo bali karambia untuak kolak jan dikukua sampai takarak. Pulang kawan ambo mambao santan kironyo, indak takana mangecekkan ka urang karambia sajo. Gagallah ambo mambuek lapek sagan.

Kini, ado pisang buai sasikek. Barencano pulolah ambo kammabuek lapek sagan. Ambo bali karambia bakukua. Ambo bukak pisang dan barameh jo karambia, baagiah garam saagaknyo. Sipuluik dibasyah dan bamasuakkan ka adonan tadi. Ambo kicok, lai taraso garam.

Dianokkan sajo dulu adonan tu. Lah salasai karajo, diambiak daun pisang batu tu disanggai, paneh ndak nampak untuak malayuakan daun.

Ambo bungkuih adonan tadi, lupolo baa caro mambungkuihnyo. Bungkuih nan partamo bapalituakkan ka balakang se ujuang jo pangka daun. Malebe bantuaknyo, baru takana, dilipekkan sagenek.

Tabungkuih sado adonan dihabuih dalam rangsang. Ntah bara jam, diangkek lai. Ambo dinginkan ciek.

Hasil lapek sagannyo adolah

1. Indak padek

2. Sipuluik masih ado nan badatuih

3. Indak manih bana

Lah dipikiakan tanyato kasalahan ambo adolah sipuluik indak barandam, indak batambah gulo, karano pisangnyo alun lunak bana. Dek ndak padek, mungkin kurang karambia atau sipuluik. Antahlah nan jaleh taragak lah lapeh.

Takana diambo wakaktu ketek dulu. Mambuek lapek apopun batunggu pisang lah lunak lunak dek ndak tamakan. Kalau indak ujuang ujuang pisang, labiah bajua ka pasa. Dulu pisang banyak. Paliang kurang satandan saminggu ado dapek. Indak ladang awak, ladang urang di balakang rumah (lah izin di urang ladang)

Apo lai di rumah nenek ambo, penghasilan dari pisang di ladang. Ujuang pisang banyak bana tu. Bakubak sado nan tingga, beko dibuek nenek lapek bareh atau lapek sagan.

Itu carito ambo nan mangidam lapek sagan, lain wkakatu dibuek dan diparatian namo nan slaah buek tadi.