Jaan Digemai Juo -7

Irwanto

Mayik dimasuak an ka rumah sudah, mukonyo diadok-an ka kiblat, buhua dilapeh ciek-ciek, dikalang jo papan sacukuiknyo. Tanah dikapa untuak pangalang, dikabia batanang-tanang untuak panimbun, di buek kalawang nan manggunduak, di cucuak-an pudiang kaganti tando.

Pudiang dicucuak-an di duo tampek. Nan ciek saarah jo kapalo, nan ciek lai satantang jo kaki. Disiramlah tanah jo bungo rampai, ditutuik jo doa dek Tuanku Labai.

Sarentak sado nan tibo, babaliak arah manuju tampek masiang-masiang. Nan sapangka urang nan dakek jo maniangko, pulang mambowok osong-osongan nan tingga kasua sarato banta. Lapiak diguluang, salimuik di lipek, cerek nan pambawok aia panyiram tanah sato dikamehan.

Urang bajalan pai pulang, nan mayik tingga bakalang papan di dalam tanah. Indak ado surang juo nan namuah ka mangawanan. Indak kawan nan samo gadang, indak pulo dunsanak sapaghabaian. Anak jo bini sato maratok, urang sabak dek basadiah. Kok ado Amal Ibadaik nan dikarajoan wakatu hiduik, itu lah kaganti sitawa jo sidingin wakatu Malakaik Mukar jo Nangkir batanyo.

Ndak ado nan bisa dibuek lai. Ko ka minta hiduik baliak untuak baibadah, pintu tobaik lah ditutuik dek Allah. Padoan sajo timbangan ateh doso jo pahalo.

Kok ado na nan kamanolong, anak nan shaleh nan ditinggaan, cukuik didikan kabakeh inyo, mandoa an ayah sarato bundo. Kok ado bakapandaian, paguno dek urang banyak, sato mangalir pulo pahalonyo. Dek awak indak pancake, suko ba infaq jo basadaqah, manjadi amal jariah nan pahalonyo taruih ado samaso di pagunoan urang untuak baibadah.

Bukik gonggang jo tabiang tarah. Anak malapeh layang-layang. Tingga sayang tinggalah lah molah. Ayah bajalan indak ka pulang. Jo aia mato urang tagamang mancaliak putuih tali gantuangan. Kama jando jo anak yatim ka batenggang.

Lah pulang dari pusaro, duduk sabanta Mak Itam manunggu Tek Kenek, nan bapailah batinggalah jo bini maniangko. Fitriati jo SI Yessi urang simpang ampek toboh, putuih bajulek otanyo ingkin kamari. Si Mimi sato bakameh di dapua manyadioan hidangan urang nan litak pulang pusaro.

Samantaro itu Jang Eric duduak manyisi manjauah-jauah, duduak sambia main hp, mambulakang bulek ka urang rami di lapau tingga nan panuah jo sabuik buah karambia. Takuik inyo ka kanai paulahan dek Fitriati, kondak kanai anggah-anggah dek Mak Itam.

Ndak lamo Jang Erik duduak, taraso ado nan mangubik bahunyo. Mangka bana hati Jang Eric. “Manga juo pajako mangaja kamari kolai, alah lesoah badan waden dek inyo.” Mangecek surang Jang Eric sambia mangibehan tangan nan mangubik.

Kubik sakali dipadian, kubik kadua Jang Eric mangalenyuik, ”Jan a, ndak sagan baa lo ko dek urang rami.”

Tibo kubik nan katigo, dikarehaannyo suaro dek Jang Eric, “Jan digemai juo den, Fit!.”

Mancaliak urang nan rami dek kareh bana suaro Jang Erik. Mandongak kapalo Fitriati nan sadang maota pasai jo Yessi Hasni.

“Dajang….Ado baruak gadang dakek Dajang!“ Sorak Fitriati.

Takacabuang Jang Eric, tabasuik galak Sifit jo mak itam.

Ndak tantu kadisabuik dek Jang Eric. Darahnyo badampong-dampong sudah takajuik. Tagak pasandiannyo mambayangan kok sampai kanai kuih talingonyo dek baruak gadang tapauik di pondok sabuik.

Indak sajo Mak Itam jo Fitriati galak tabasuik, Yessi Hasni sato pulo. Baru jaleh dek Si Yessi rupo Jang Eric, kironyo kawan inyo samo sakolah, ”O…Jadi jo Gusriadi, Sifit jadinyo? Baa kok wakatu sekolah bantuak urang ndak kenal sajo?”

Jo galak sengeh Fitriati manjawek. Nan Jang Eric karuik sabaleh kaniangnyo mandanga. Ndak bajawek tanyo Si Yessi karano Tek Kenek lah maajak pulang.

Tibo di ateh oto baru dilapehananyo galak sagadang-gadangnyo dek Mak Itam sarato Fitriati. Nan Tek Kenek galak kudian sasudah dijalehan.

“Ndeeh lah tando tumah ndak Mitam a? Baruak nan mangemai, Ifit juo nan dituduah Dajang ko. Lah bulek pangana Dajang ka Ifit, mah.”

“Antok lah, Fit. Mancaracau co murai kincak sajo kau sajak tadi.” Kato Jang Eric tabik rabo.

“Dajang…Lunakkan lah hatmu untuk menerima Ifit apa adanya!”

Tambah berang Jang Eric, tambah dipaulahannyo dek Fitriati. Mak Itam jo Tek kenek lah sato pulo. Nan Si Mimi tingga di rumah duka.

Nan Fitriati, dek manampak buruang gagak, jatuah lah badan katangah sawah. Dek pajalanan sambia galak, taraso capek sampai di rumah.

Lain pulo Jang eric, dek manampak buruang puyuah, sakali duo sakok dibali. Dek kanai paulahan badan marusuah, raso katunduonyo oto supayo kancang lari.

Alah baminyak baparfum pulo, kito bajalan babimbiang tangan. Alah tamaik “Jaan Digemai Juo”, kito sambuang jo “Ambo Rela Asa Talak Uda Jatuahan”. Baco sanak dih! Satiok sabtu jo minggu kito bakumpua di gurusiana mambaco carito babahaso minang.

Maaf kolau ado kamiripan namo jo carito. Iko murni karangan sajo.. Sabtu baisuak kito taruihan. Tarimokasih, Sanak. Wassalam.

Pariaman, 16 Agustus 2020