Malewa-2

Penulis : Irwanto

Kapa balaia ka Suranti. Nahkodo banamo Lisata Li. Mambongka sauah di lautan.

Kaba diuleh kini lai. Kabakeh Syahmanis jo Sofialdi. Sadang bagolak golai di jalan.

Tabasuik galak sofialdi mandanga Syahmanis manyabuik namo Piak Pukek, namo kasayangan dari ayahnyo.

“Masa iya orang secantik kamu diimbau Piak Pukek? Emangnya burung?” Kato Sofialdi sambia galak kisiak maujah Syahmanis.

Tapi kok di pikia-pikia pulo, caro urang saisuak sabana banyak gadelenyo. Raso sayang ka anak indak hanyo ditonek-tonek, jo gala-gala dipabuek. Lah sudah namo nan rancak, dek mandapek anak padusi baagiah namo bamanjo-manjo. Supayo pandai kadapua anak banamo Rifni di agiah gala piak abu. Dek jangek kulik putiah barasiah badan badagok lo, namo Irmayulis di imbau Piak Lambuak. Dek kulik putiah manjalinok, Suryani lah baaliak namonyo manjadi Piak Amba. Ado pulo Piak Taba, Piak Amuik, Piak Tenteang, Piak Oyoh, batambah-tambah namo anak dek rang gaeknyo.

Banyak kobeh-kobeh urang kampuang maso saisuaik tantang namo. Lah sarancak tu namo diagiah dek rang gaek, batuka-tuka dek inyo, muhamammad jadi siamaik, suhardi jadi waradi, khaidir jadi idir, sat jadi saik, Fajri jadi pajiri. Apolai kok ado namo banyak nan sarupo lah sudah tambahnyo dek urang. Tambah tu ko lai nan rancak ndak baa doh, kok indak, jo kulikaik buruak di lakekan kaujuang namo tu. Nan youang sunguik lah, youang cule lah, youang picak lah. Nan Muhammad takah tu lo, maik pati lah, maik dukun lah.

Tapi itu dulu, kalau kini? Kajang galak Syofialdi namo Piak Pukek nan tasabuik dek anak gadih nan gadang di rantau.

“Lucu, ya?.... Emang, sih. Kata Bapak, pukek itu artinya memikat”

“Benar, istilah itu tepatnya untuk burung, kalau orang....” Kisiak galak Sofialdi dek ganjia tadanga di talingonyo. “Tapi bapakmu benar juga. Kamu itu, kamu benar-benar memikat. Sekarang aja kamu sudah memikat hatiku.” Maluncua garah selengeh dari muncuang Sofialdi kini. Merah muko Syahmanis kanai ujah.

Tabukalah nan tasumbek sajak dari tadi. Lah mulai bagarah urang ko baduo. Ado-ado sajo nan tasabuik kini lai. Raso cangguang lah mulai hilang. Bantuak urang lah lamo bakatahuan.

“Itu Apo, Da Fial?” Kato Syahmanis manunjuak tumpuak an pipa basi panjang manggunuang di tapi lauik dakek Sikolah Tinggi Pelayaran. Pipa basi nan dibawok jo kapa lauik ka untuak mambuek darmaga.

“Manaa? Oooo itu? Itu Chocolatos.“ Kato Sofialdi manyabuik gunduak an pipa basi.

“Sembarangan. Benda segedek gitu dibilang chocolotos, gimana ngabisinnya?”

Ndak baiyo-iyo Sofialdi doh, dibelok annyo oto ka arah gundukan basi nan disabuiknyo chocolatos tadi. Dek raso ingin tahu Syamanis, dipadiannnyo Sofialfi mambawok oto baranti mandakek gelondongan basi. Turunlah Sofialdi jo Syahmanis.

Dek mancaliak iko baru, dikaluannyo lah hp dek Syahmanis. Ba Selfi lah inyo. Ntah sia nan maajak, lah fhoto baduo inyo kini. Macam-macam gaya nan dibuek. Dari muncuang mancibia sampai takulayak, dari kapalo teleang sampai cugun, dari mamiciangan mato sampai mambulalak sagadang-gadangnyo. Pipia kondak bakempuik an, kondak bagambuangan. Nan jari dipamacaman pulo. Ado manunjuak, ado lo co urang ka manembak.

Ko tangan bakambangan bantuak urang katabang. Adolo balagak co alang kamanangkok. Nan jarak kini lah badakok pulo, ampia ndak bajarak pipianyo baduo doh. Nan tangan Sofialdi pun kadang lah tibo lo dipinggang jo di bahu Syahmanis. Bantuak galondong basi inyo nan punyo.

Sadang kalasuahan baselfi, tibo sarombangan anak mudo mamakai motor baranti ndak jauah dari tagak Syahmanis jo Sofialdi . Bacilapuik onda nan dipakainyo. Kanalpotnyo baasok, suaro motornyo mamakak bunyi belek digolek an.

“Yan....... Yan Ridwan .....Waang lah nan kasinan. Agak labiahan mintak! Badagiang bantuaknyo tumah.“ Kato salah surang dari rombongan ka bakeh kawanyo nan banamo Yan Ridwan. Laki-laki nan banamo Yan Ridwan maekeh bajalan kaarah Sofialdi jo Syahmanis.

“ Aman tu, lai bantuak simpuluik nyo.“ Jawek Yan Ridwan.

Jikok manabang batang sagu, abih ditabang buek bakabuang. Ambo cukuikan kan hinggoko dulu. Hari baisuak kito sambuang.

Maaf, jikok ado nan ndak katuju. Maaf kok ado kamiripan namo jo carito. Iko murni karangan ambo sajo. Tarimokasih, Wassalam….. (Otnawri Nawri)

Pariaman, 04 Juni 2020