Irwanto, M.Pd

Buah pauah buah kunini

Di kuih anak Si Ranggoani

Kito lanjutan carito Ajo Zamri

Pai bakawan-kawan ka Aia Tajun Pelangi

Hari nan sadang tangah hari

Litak badan dek jauah bajalan

Lia mato Khaidir mancari-cari

Dek ndak manampak Mak Itam dalam rombongan

“Manyo Mak Itam? Indak sato inyo pai doh?” tanyo Khaidir untuak nan kaduo kali ka bakeh Zamri. Tangangak Zamri dek kuaik suaro Khaidir, samantaro inyo sadang lasuah maujah-ujah kawan.

“Baa kok batanyo bana dek Khaidir, Mak Itam tu? Apo na paralunyo dek Khaidir, Mak Itam?” jawek Zamri bunyi urang bakabangihan.

Tantu iyo, paneh hati Zamri wakatu kabarangkek tadi. Lah arek janji kapai basamo, lah tagang urek lihia manunggu di simpang pato, nan Mak Itam indak mancogok-cogok juo. Jo hati mangka Zamri maajak kawan-kawannyo pai, nan Mak Itam ditinggaannyo.

“Mak Itam tu otanyo sajo nan gadang. Sagadang badannyo pulo. Ma pulo talok dek inyo kamari, angoknyo sajo balapuih-lapuih. Bakarajo lo kito kalau inyo pai beko,” salo Linda sambia mamiyuah kaus sipatunyo nan lah panuah baisi jo aia wakatu manyubarang cako..

“Ancak inyo ndak pai. Kok pai inyo habih kito kanai karajoaan dek inyo. Matiko langek. Jan kan ka kawan-kawan, guru sajo kanai paulahan dek inyo,” salo Evi Zarani sambia mancaritoaan parangai Mak Itam wakatu di SMA dulu, samaso paraktek Biologi samo Ibu Mardeni nan manjadi gurunyo.

“Bacaruik bungkang Ibu Mardeni dek ulah Mak Itam tu!” kato Evi Zarani sambia barangah duduak di batu tapi aia.

“Baa pulo caritonyo?” tanyo Si Nel nan pingin tau.

“Wakatu tu praktek mancaliak organ dalam tubuh hewan. Urang mambawok koncek nan ka dibadah, nan inyo mambawok lauak tabek. Antah tabek sia nan dibongkanyo. Urang mambadah koncek, nan inyo mambadah lauak tabek. Nan diparagoaan urang organ hati, jantuang, limpo, jo paru koncek. Nan inyo, diparagoanyolo isi paruik lauak. Manyumpah-nyumpah Ibuk Mardeni dek dionyokannyo bana ka hiduang ibuk tu.”

“Baa kok manyumpah ibuk tu?” tanyo Zamri.

“Baa ka indak dek Si Zam, cirik dalam paruik lauak nan diparagoaanyo. Tajilowek ibu tu mambaunan.” Galak sado nan pai mandanga carito Evi Zarani.

Dek wakatu bajalan juo, dihabihan lah rangah, mulailah rombongan barangkek manaruihan pajalanan. Sadang dalam basah sasudah manyubarang batang aia satinggi pinggang, kini rombongan ko manaruihan pajalanan. Kini nan ditampuah jalan satapak nan indak hanyo basamak tapi mandaki pulo.

Sungguahpun jalan samak nan ditampuah, namun nan urangko, sambia bajalan baselfi juo. Apolai basobok pipa basi sagadang polongan jambatan, barengge urangko bafhoto. Ado nan maneleangan kapalo, tangan batagakan duo jari, adolo takah urang manembak, nan basibuyuik manakan bahu kawannyo dari balakang ado pulo. Bayangan sajolah urang nan sadang kagadangan hati bafhoto. Galak sengeang sajo kasadonyo, indak ado nan mambirunguik takah biaso.

“Jauah kolai, Khaidir? Lah naiak batiah kaki waden a.” tanyo Si Linda nan lah mulai kalatiahan dek jalan nan ditampuah kini mandaki.

“Sapuluah kilo lai,” jawek Khaidir santai.

“Ha?”

Takajuik induak-indauak nan sato pai. Nan Khaidir galak menyareheang.

Habih mandaki, manurun jalan nan ditampuah. Kalau mandaki jalannyo basamak, tapi kalau manurun jalannyo babatu, manyisi tapi aia. Banyak batu gadang licin nan dilaluli. Lah raso manjajah lo dek urangko. Makin lamo jalan nan di tampuah makin sulik.

“Hati-hati batu tu licin!”

Dijalan manurun dari tabiang ka tapi aia Khaidir basorak mancaliak kawan-kawannyo tasinjaja manurun. Talambek khaidir maagiah tahu. Si Fit lah tadodong tasinjaja ka bawah. Batu licin lo nan tapijak dek inyo. Tasialia Si Fit sampai basilosohan jatuah ka batang aia nan babatu gadang. Hilang.

Hilang kini Si Fit dari mato kawan-kawannyo. Kama Jatuahnyo Si Fit? Lai ndak baa inyo, tu? Kito cukuikan dulu carito sampai disiko untuak samantaro, baisuak kito sambuang sanak lanjutannyo.

Tarimokasih nan lah mambaco carito ambo, mohon maaf kok ado namo jo carito nan sarupo, karano iko hanyo dibuek-dibuek sajo. Wassalam.

Pariaman, 06 Februari 2021