Catetin catetan #298

"Nah, pan gua kate juge ape, bader sih!" Bang Gani nyeplak. Pagi-pagi sambil ngegares nasi uduk mpok gendut. Nasi uduk super duper enaknye. Bukan ngiklan nih. Emang enak. Apelagi laiknye pake semur jengkol. Pokoknye rumah mertua mah kagak kliatan. Jauh ....

"Emang ngape, bang. Pagi-pagi udah kayak kaleng rombeng. Nyaring banget ..." mpok gendut nimpalin.

Mulut bang Gani monyang-monyong ngunyah jengkol. Tangan kirinye sambil ngesekrol berite dari koran onlen.

"Ini gua lagi bace berite. Ade sekolahan yang guruhye pade kena kopit" jelas bang Gani jawab komennye mpok Gendut.

"Iye, bang. Aye juge bace kemaren sore. Lagian sih, udah tau lagi musim kopit pake piknik segale" Ucup nimbrung.

"Ntu die, Cup. Sekolah agame tapi kagak bise jaminan orang-orangnye ngamalin agamenye. Ntu contohnye. Pan orang liatnye begono. Kudu jadi contoh nih kite, orang Islam. Kebersihan pan sebagian dari iman, ntu petame.  Keduenye, kite kudu peduli kesehatan dan keselametan. Kalo udeh kejadian baru deh nyesel" Bang Gani emang orang yang peduli. Wajar kalo due ngedumel ame yang kagak sesuai dengan ketertiban. Apelagi mase pandemi.

"Gini hari masih bader aje, guru lagi!" Mpok Gendut juge kesel.

"Iye, bikin was-was masyarakat aje. Pan bise nularin kemane-mane tuh kopit" Ucup gemes.

"Aye aje nahan diri, di rumeh aje nih udah sembilan bulan, kagak mantok kemane-mane" lanjut mpok Gendut.

"Sekarang beritenya piral dah. Bikin malu, kagak mikir!" Telunjuk bang Gani ke kepale.

"Iye, kayak kagak ade otaknye aje" Ucup nimpalin lagi

Mereka berdue akhirnye diem. Nikmatin nasi uduk. Sementare mpok gendut sibuk ngelayanin yang pesen. Bang Gani nerusin bace berite. 

(Bader artinye bandel, nakal, ngeyel)