Cerite wiken #291

"Nama yang bagus nih buat si jabang bayi" Imron emang lagi bingung cari nama buat anaknya. Maklum bapak baru. Barusan dia baca sepintas judul berita di surat kabar online.

"Minah, ini nama anak kite, Happy Hypoxia, bagus kan?" Tanya Imron ame bininye, Aminah.

Wajah Aminah berubah sambil nahan mules. Biase, kalo udah delapan bulan ke atas, mules-mykes mulain dirase. Kate dokter sih, mukes palsu. Tuh mules aje ade yang palsu. Apelagi janji-janji pilkada. Jangan kemakan janji dah! Mending makan gado-gado dari pade makan janji. Ngadi-ngadi aje!

"Abang kalo ketinggalan berite jangan kejauhan. Begono deh akibatnye.

"Lha, jelek ye?

"Bukan jelek lagi. Kagak pantes, bang"

"Emang artinye ape, Minah?" Imron mlongo.

"Happy Hypoxia ntu gejale orang kena kopit" Aminah nyoba ngejelasin.

"Maksudnye?" Imron masih belon mudeng. Die kagak ngarti.

"Begini kalo bangku sekolahan kagak dikunyah. Dateng ke sekolah cuman produksi iler. Ulangan nyalin jawaban temen" dumel Aminah.

Aminah bukain web tentang Happy Hypoxia buat Imron. Imron serius bacenye. Bibirnye ampe monyong-monyong jayak mulut soang.

Jadi, ntu name gejale orang kena kopit. Baru tau, nih. Orang yang kena serangan kopit kurang oksigennye dalem darah. Kagak ade gejale seperti biase orang yang ketularan kopit. Wah, bahaye. Gawat ini. Tau-tau orang itu tepar kagak ade napasnye. Gagal napas gitu" Imron geleng-geleng kepale.

"Iye bang, mangkenye kite kagak boleh ngeremehin tuh si kopit. Orangnye sehat ujug-ujug mati, ngejogrog kagak sadarin diri. Ini lebih bahaye sebab ngedadag"

"Kayak tahu bulet dong. Abisannye tuh nama bagus banget, kayak nama artis yang ade nama Happy-nye, siape tuh?"

"Udah nyok bang, anterin ke klinik Darus Syifa, entar keburu tutup"

"Ayo dah, beb ...."