Catetin catetan #278

"Kurang bae apa si Johari, cobe?". Semue kepengenannya diturutin. Dumelan Sarwin di depan Takdir.

Takdir mah mesem bae. Mesem aja bae. Apelagi ngebantuin jelasin. Tau pan, mesem? Nah itu die yang jadi sebab Sarwin marah banget. Mukenye mereh nahan marah.

"Kesianan pan Johari, dibilang kagak bener terus. Cuman karena pernah saleh. Tapi pan kagak bener juge semuenye dianggap saleh. Pejajaran bet dah, Madi!"

Emang Madi begono orangnye. Gampang banget bikin stempel. Mentang-mentang die pejabat. Padahal die jadi pejabat juge sebab ade babenye. Coba kalu bukan Babenye, palingan jadi tukang ketik.

"Ojo ngono, toh yo Mas Sarwin. Sing sabar. Gusti Alloh mboten sare. Solider boleh, emosi jangan!" Sudiro nenangin Sarwin yang kadung emosi.

Wajar juge sih Sarwin marah. Semue udah pade capek. Lelah. Kegiatan bikin panggung hari Guru. Tapi masih disalah-salahin terus. Johari sebagai koordinator dibilang yang kagak-kagak. Kalo kagak inget die guru, udah diberi tuh si Madi.

"Iye bang Sarwin. Jangan emosi. Johari juge kagak marah" Mpok Rika ngademin. Emang mpok yang satu ini kalo udah ngomong bikin adem. Kayak AC gitu.

Perkara stempel emang bikin ribet. Gini hari masih suka bikin stempel. Kurang jauh maennye. Sebagai makhluk sosial emang perlu gaul. Biar wawasan kebuke. Kagak lagi bikin cap yang jelek buat orang laen. Termasup bikin stempel jelek untuk murid-murid. Eh, kebalikannye murid juge suke bikin stempel untuk guru. Coba deh ditelisik. Ibarat peribahasa, Guru kencing berdiri, murid kencing berlari.

Bang Sarwin diajak Sudiro ngadem di kantin. Takdir dan mpok Rika nemenin. Mereka berempat minum es kelape mudenye bang Syukur yang terkenal enak.

(Nama-nama hanya fiksi jika ada yang sama hanya sebuah kebetulan. Bukan ada maksud lain)