Episode 1

Oleh: Maskurdi

Tang...tung...tak....gending

Tang...tung...tak....gending

Tang...tung...tak....gending

Tang...tung...tak....gending....dooorrr........

Monyèna bhu-tabbhuwân cè’ rammèna meddhâl ḍâri mongghing Bârâ’-ḍâjâna Kampong Ghiliyân. Tambâ abid tambâ semma’ kongsè bâḍâ è buḍina ḍâporra Ma’ Suha. Cora’na ḍâri monyèna sowarana, akantha bâjhân, jerigèn, sobbhlug, tong-tong, ghung, bân laènna sè ètabbhu. Atambâ rammè polè karana bâḍâ sè ra’-èra’an cè’ bhânterra.

“Mat Hari...”

“Mat Haariii...”

“Mat Haaaariiiiiiiii...”

          Bunadin sè asalla ju’-toju’ akonḍâng neng langghârra Kè Dulla, ghetton kadhibi’.

“Du... jhe’ rèng bâjâ Maghrib mara satèya orèng rèya sè amaèn bhu-tabbhuwân”.

Bunadin sajân manèlèng kopèng sè ngiḍingaghi monyèna mè-rammè ghi’ bhuru.

“Tapè massèya bâḍâ sè nangis, cora’na”, ca’na Bunadin ka abâ’ dhibi’, ta’ kadentèn lajhu berka’ nyosol ḍâtenggnga mè-rammè ghi’ bhuru. Saellana napa’ ka buḍina ḍâporra Ma’ Suha, Bunadin atambâ ghetton polè karana sè mè-rammè ghi’ bhuru bânni coma bhu-tabbhuwân bân ra’-èra’an tapè lerres bâḍâ sè nangis.

Ropana mè-rammè kasebbhut bannè namong sèttong ghâlimpo’. Bâḍâ tello’ ghâlimpo’ sè bâng-sèbângnga paḍâ rammè. Bâḍâ sè nèngtèng tor nabbhu lat-alattha ḍâpor, bâḍâ sè athowat, bâḍâ sè nangis, tor bâḍâ sè abhakta oncor bân santolop. Polè bâḍâ sè nèngtèng satrongking cè’ bhurâna. Bunadin terros nyemma’ ḍâ’ ghâlimpo’ sè nèngtèng satrongking. Ropana bâḍâ sè kennal.

“Lu’ ra To, bâḍâ apa rèya ma’ cè’ rammèna?”, Bunadin atanya ka Misnoto.

“Mat Hari èlang”, jâwâbbhâ sè ètanyaè.

“Mara jhâ’ aghâjâ’, cah!”

“Ba’na rèya atanya, tapè bilâ èjâwâb pas ta’ parcajâ. Ma’ rèpot bâ’na”.

Bunadin lajhu diyem, tadâ’ sè ngajhâg pas terros noro’ buntè’ ghâlimpo’ ghi’ bhuru. Orèng sè ra’-èra’an ngolok nyamana Mat Hari pagghun nyarèng. Monyèna tabbhuwân atambâ rammè. Tèra’na santolop asèpsap aghâli’lap noccer ka sakabbhina dhu-paddhu sè petteng. Ropana sè ghetton bânnè namong Bunadin. Bânnya’ orèng laèn sè noro’ asèpsap neng èghalimpo’ ghâpanèka, samè mengnga’na.

“Ral, bârâmma carètana Mat Hari rèya ma’ lajhu bisa èlang?”, Karim atanya ka Sahral.

“Ba’na atanya ka sèngko’, Rim. Sèngko’ lajhu atanya’a ka sapa rèya?”, ca’na Sahral.