Kapatang ambo jo anak ambo ka pai pasa. Dek akhir bulan caritonyo, jadi lah kanker ambo alias kantong kering. Sebelum sampai ka tujuan di pasa tu, singgah lah ambo ka ATM untuak mancaliak - caliak kok lai ado nan bisa ka ditarik kalua. Setelah ambo intip - intip kironyo lai ado rejeki anak sholeh tu taselip saketek. Ambo ambiak lah nan taselip saketek tu.

Sadiang mancari nomor pin ATM di hp, masuaklah amak - amak baduo jo anak gadihnyo ka maambiak pitih pulo. Tagaknyo di ATM yang disampiang ambo. Amak tu ndak pulo lah batanyo - tanyo dulu do, ambo pun ndak pulo mamperhatikan amak tu do. Lah dimasuakannyo kartu ATM nyo ka masin tu. Lah dimasuakkan pulo pin nyo, lah batakan pulo angko pitih nan ka diambiak tu. Ditanyo dek masin ATM ka amak tu, apo yang dimasuak an tu lah batua? Dikatan dek amak tu baliak benarnyo.

Sudah tu tangan amak tu lah siap - siap manampuang pitih yang kalua dari masin tu. Lah 5 menit manungguan piti tu, ndak juo kunjuang dikaluan dek ATM ko do. Lah cameh amak tadi karano takuik pitih e ilang. Diulang nyo sakali lai mangaluannyo, kiro e samo juo baru, ndak juo nmuah kalua do.

Mangecek lah amak tu ka anak gadih nyo, "baa pulo lah ATM ko kni? indak amuah kalua pitih dek inyo do. Ko lah 2 kali diulang ndak juo namuah kalua do. Lai ado bapitih di dalam ko atau ndak ko" kecek amak ti ka anak nyo.

"Cubo lah baliak bu, kok lai nmuah nyo siap ko" kecek anak nyo pulo. "Indak ibu ka maulang baliak do, lah 2 kali tadi mah ilang piti dek nyo, nan wak ambiak ndak juo namuah kalua do" kecek amak nyo pulo. " Minta tolong lah awak ka urang bu untuak maambiaknyo" kecek anak nyo pulo. " Mo lah kalau baitu" kecek amak nyo tando setuju.

Kironyo nampak ambo dek amak tu lai bisa mangaluan piti dari ATM tu. Batanyo lah amak tu ka ambo. "Baa kok lai bisa dek anak kalua piti nyo nak? Ibu dari tadi lah 2 kali mancubo ndak amuah kalua piti do. Tolong ibu ciek nak" kecek anak tu ka ambo.

"Ibu ka maambia piti? " kecek ambo. "Iyo nak, tapi ndak bisa-bisa do" kecek ama tu pilo baliak. "Tu lah iyo ndak bisa ibu maambiak piti do bu, ATM itu hanyo untuak mancek rekening samo mantransfer sajo nyo. Pindah lah ibu ka ATM yang ado tulisan pitihnyo tuha, kok yang 50 ribu atau 100 ribu. Beko kalua pitih ibu mah" kecek ambo ka amak tu.

"Baitu pulo kini ATM ko tu nak, ndak tau ibu do kalau ado ATM nan model itu. Ma kasih yo nak lah maagia tau ibu" sambuang amak tu. "Yo bu, samao - samo, ambo duluan kalua yo bu" kecek ambo ka amak tu. "Yo nak" jawab amak tu. Sudah tu ambo pai ka pasa lai samo anak ambo,