Hari Sabtu kapatang bu  Upik pai raun jo sanak kaluarganyo jo minibus, karano sanak bu Upik banyak makonyo  barangkek jo oto nan agak gadang . Kalau jo oto kenek ndak tamuek kasadoannyo do, tapi kalau jo oto nan gadang ko bia bisa bagalak galak basamo. Barangkek dari kampuang lansuang manuju jalan Batu Sangka dulu  supayo ndak basuo jo macet di Padang Lua.

Barulah manggarik oto, tarasolah paruik Mak ngah ndak lamak lai, padohal Mak ngah lai duduak di bangku  balakang sopir. Raso ndak muntah tapi ndak ado kalua. Maloyo kecek urang namonyo. Alah banyak nan mancogokan minyak kayu putih, fresh care, jo antimo bagai tapi Mak ngah masih nampak pucek manahan isi paruik nan ndak amuah kalua. Takah ikolah Ma kngah, indak lamak paruik kalau ka baoto oto ko.  Alah makan gulo gulo pulo 5 tapi paruik Mak  ngah ndak lamak juo keceknyo.

Jam 11.00 siang sampailah oto di Bukit Tinggi, mancari tampek parkir di  tampek nan lapang khusus  bus. Mak ngah ndak talok lai manggarikan badannyo, hanyo duduak di bawah batang kayu untuk malihangkan raso mual di paruiknyo.  Bu upik  nak pai ka pasa ateh mambali pisang kapik  nan bagulo merah. Ditanyoanlah ka Mak ngah  apo nan taragak untuak dibalian. Dek paruik Makngah alun lamak juo lai, makngah maagiah kode sajo jo jarinyo bantuak bulek bulek 2 kali. Bagagehlah bu Upik mambali kandak Makngah tadi. Sudah mambali pisang kapik, Bu Upik lansuang mambali godok  ubi 20 puluh ribu. Bu Upik lansuang pulo maantaan k dakek mak ngah nan masih duduak di bawah batang kayu tadi. Ruponyo baru di caliak isi kantongnyo jo Mak Ngah, lansuang kalua suaronyo “ Baa kok godok nan upik balian, Mak ngah mintak balian karak kaliang tadi mah”. Hhh..kironyo  Bu Upik salah panafsiran jo kode makngah yang 2 bulek bulek tadi.

Saniang Baka Solok, 12 Juli 2020