Tantangan Menulis Hari ke-30

#TantanganGurusiana

Sabalumnyo ambo pernah manulis gulai mani bada. Samba ka pambangkik salero makan. Nan kini ado ciek lai. Kalau tuan puan sadang patah salero mako cubolah makan jo palai bada. Dijamin tabik salero baliak.

Sejenis palai-palaian ko banyak ragamnyo kito tamui di ranah minang. Di kampuang ambo di pasisia umumnyo nan dipalai tu isinyo bada sajo. Di daerah darek batamu kito jo palai rinuak atau juo palai lauak bilih dan lainnyo.

Olahannyo pun baragam. Ado nan di palai jo bumbu karambia. Ado pulo isinyo lado sajo sarato bumbunyo tanpa karambia. Palai lado istilahnyo. Di darek ado pulo tasuo dek ambo isi palai ditambah jo daun pucuak ubi di salo-salo bumbu karambia.

Kok caro mambueknyo hampia samo. Kalau palai bumbu karambia di giling alui karambia agia kunyik, asam jo bawang bisa ditambah lado saketek ka ganti syarat padeh sajo. Saratoan pulo daun kunyik jo ruku-ruku. Terakhir galimangkan jo bada basah. Sudah tu bungkui jo daun pisang. Baka sampai angui daun pambungkui tadi. Walaupun nan pambungkui angui namun isi nan di dalam aman tajago.

Di makan angek-angek jo nasi baru masak, deh yo bana sero. Harumnyo daun-dauan manambah sumangaik ka makan. Ndak sadang sabungkui di bae duo bungkui. Asa lai salero tabik hajar tarui.