Menuju tantangan 365 hari

Hari ke-107

#TantanganGurusiana

*

Onjak Talabiah

*

Tradisi baralek di Ranah Minang taraso kurang sumarak kalau ndak ado bunyi-bunyian atau musik. Utamonyo baralek Anak Daro atau baralek Marapulai. Bunyi-bunyian tu ado musik tradisional, sarupo Saluang, Rabab, Indang, dan sabagainyo. Tapi sajalan jo parubahan maso, musik tradisional ko alah susah ditamui tampek baralek, karano lah baganti jo Orgen tunggal nan labiah moderen dan labiah murah sarato meriah. Nan jaleh baralek taraso indak meriah kalau indak bamusik, kecek nan mudo-mudo. Baitu pulo pandapek Udin Peter, si Bujang Lapuak nan indak pernah absen bajoget satiok ado urang baralek di kampuangnyo.

"Din, lai dapek kaba ang bagalek si Lijah Akaek di mungko?", Tanyo Yuang Codoek. "Lai lah nyo dek ang. Wakden nan mancarian calon ampulainyo tu mah", jawek Udin Peter mambusuangan dado. "Owaek, contun kiro e yeh", jawek Yuang Codoek jo logat Piamannyo. Sasudah tu Yuang Codoek pai ka rumah urang nan ka baralek tu untuak manolong mambuek pondok tampek mamasak Nasi Kunik sarato mamasak samba Randang. Sudah tu inyo sato pulo mambalah kayu baka sampai manyusunnyo ka pondok. Iyo bana capek kaki ringan tangan si Yuang Codoek ko.

Tibolah hari baralek. Sajak hari Sabtu sasudah Luhua sampai hari Akaek manjalang Magrib adolah hari alek. Hari nan katuju bana dek Udin Peter. Baa ka indak, memang hobi bananyo bagoyang sadang artis balagu tu. Hujan baiak lah hari, nan inyo tataok sumangaek bajoget. Kadang-kadang urang maraso tagaduah pulo mancaliak gaya bajogetnyo nan basalahan bana garik badannyo. Buruak cando alias porno. Kadang-kadang indak Pulo sasuai jo irama musik doh. Nan katuju ado pulo, makonyo Udin Peter laku juo. "Oi, Din, kamarilah ang sabanta lah", Sorak Tek Timah. "Apo tu, Tek, serius bana", jawek Udin Peter. "Ang tuka joget ang tu jo Dance bagai lai baa nyoh?, Bosan Etek mancaliak itu ka itu seh". "Alaaah, Etek dek bingik se tu nyo. Indak lo pandai tu doh!. Tau Tek ndak?, Dance tu asanyo dari Bulando, penjajah nagari awak, manga lo wak manirunyo!". "Eh eh eh, sombong pulo waang yo! Lai tau ang ndak?, Joget jo dance tu samo se nyo. Nan ang buek tu nan balain, namonyo ONJAK TALABIAH, titik".