Ngamumul Basa Sunda
Ngamumulé Basa Sunda
Ngala lauk disairan
Mais teri reujeung peda
Hayu urang sisindiran
Ngamumulé Basa Sunda
Mais teri reujeung peda
Dihijikeun jeung paria
Ngamumulé Basa Sunda
Dibarengan ku daria
Ka pasar rék tumpak délman
Rék meuli teri jeung hurang
Kudu reueus kudu héman
Basa Sunda anu urang
Daun cau daun wéra
Dipoé henteu ditunda
Ulah sieun ulah éra
Sapopoé Basa Sunda
Meuli sarung jeung mukena
Dipaké ulah ditunda
Dimana waé dumukna
Urang Sunda Basa Sunda
Tumpak délman maké kuda
Diukna masing merenah
Lamun maké Basa Sunda
Kudu bener jeung merenah
Kamana néangan pupur
Sok leungit lamun rék maké
Basa Sunda bakal tumpur
Ditinggalkeun teu dipaké
Ka cai rék ngadon mandi
Kadé poho mawa anduk
Basa Sunda rék ka mendi
Poho henteu sanduk-sanduk
Hayang baso anu ngeunah
Kudu bener samarana
Basa Sunda nu merenah
Kudu bener diajarna
Pangantén eukeur sungkeman
Carinakdak tur dareuda
Hayu urang babarengan
Ngamumulé Basa Sunda
Malati dijieun manglé
Seungitna kawanti-wanti
Basa Sunda dimumulé
Makéna sing ati-ati
Ka kulah rék nyiar hurang
Nu beunang geuning guramé
Basa Sunda banda urang
Dipihéman dimumulé
Tipeuting liar ngaronda
Teu poho kohkol disada
Ka para nonoman Sunda
Kadé poho Basa Sunda
Loba harta loba banda
Mawa paré mah ka leuit
Miara budaya sunda
Basa Sunda ulah leungit
Ka leuwi rék ngadon nguseup
Lengkepan koja jeung jeujeur
Basa nu pinuh pasieup
Mung Ki Sunda anu nanjeur
Rék nulis néangan kapur
dimana atuh neundeunna
Basa Sunda ulah tumpur
Sok mumulé ti ayeuna
Alun-alun kota Bandung
Terus ka Taman Djuanda
Ulah sok babari pundung
Mun teu bisa Basa sunda
Jandéla dipaés hardéng
Pulasna belél kapoé
Basa Sunda henteu ahéng
Mun dipaké unggal poé
Ka pasar rék meuli teri
Nu aya mah kalah peda
Rék miluan pasanggiri
Ngadadak diajar Sunda
Ayeuna lain kamari
Isukan lain ayeuna
Nonoman jaman kiwari
Pabeulit maké basana
Ti peuting ulah sok liar
Kajaba arék ngaronda
Sing isin ku bangsa luar
Nu mibanda Basa Sunda
Ka warung rék meuli peda
Ulah poho kuéh ali
Basa Indung urang Sunda
Basa Sunda kadé lali
Konten pada website ini merupakan konten yang di tulis oleh user. Tanggung jawab isi adalah sepenuhnya oleh user/penulis. Pihak pengelola web tidak memiliki tanggung jawab apapun atas hal hal yang dapat ditimbulkan dari penerbitan artikel di website ini, namun setiap orang bisa mengirimkan surat aduan yang akan ditindak lanjuti oleh pengelola sebaik mungkin. Pengelola website berhak untuk membatalkan penayangan artikel, penghapusan artikel hingga penonaktifan akun penulis bila terdapat konten yang tidak seharusnya ditayangkan di web ini.
Laporkan Penyalahgunaan
Komentar
Bahasa Sunda ya ibu Neneng Rahmia? Sukses selalu buat panjenengan dan keluarga tercinta