Apo lah kadayo si badan diri, niek suci ka manyuntiang urang nan salamo ko alah mananti, kini lah takubua jo pitih nan lah abih, ka hiduik basamo jo urang nan den cintoi kini ko lah pupuih dek Pandemi.

Di cubo pulo bak cando urang, pai marantau ma adu untuang, kok lai ta bangkik batang tarandam, kamambaok urang nan di cinto ka palaminan, di kao pulo bausaho mambuka kadai untuak manggaleh, ado bamodal nan di baok dari kampuang jo pitih nan lah di simpan salamo ko, kok iyo badan ko kababini, ndak kamanyeso ka urang tuo, bia nak di cubo pulo parasaian hiduik jo urang nan di cinto.

Ka kota metropolitan piliahan untuak bausaho, lah bajua jawi jo taranak nan lain kapanambah modal untuak bausaho. Dapek kadai bakontrak 5 tahun lamonyo, lah basegehan bantuak jo ruponyo, lah baganti sagalo nan ndak kapaguno, kadai lah rancak atok lah baru, lah sanang rasonyo kiro-kiro.

Nan lah tapikia dek kapalo ko, sudah rayo ka manikah jo urang nan lah manjadi tambatan hati salamo, urang kampuang nan lah mambuek mato ko buto, ndak ka taganti jo sia sajo.

Manangih mangecek ka mande kanduang, pitih habih lah lakek ka galeh jo rehap kadai untuak ka bausaho, pandemi tibo urang langang ndak buliah kalua do, jan kan kabalanjo, mandakek sajo urang ndak ado, apolai kini ko ndak buliah kamano sajo, kadai di suruah tutuik, awak ndak pulo buliah mudiak ka kampuang tacinto.

Janji nan lah tabuek, kini pupuih dek pandemi, kabaralek sasudah bulan suci ndak mungkin ka tajadi, modal jo pitih ndak ado tasiso lai, malang bana tibo di badan diri. Kok lai saba adiak mananti untuang lai ado kito barasaki.

Payakumbuh, 9 Mei 2020

#Tantangan Menulis Gurusiana H-35#