#Tagur11

Samba Lado Uwok Kapareh jo jariang mudo ..

Gabak di hulu tando ka hujan, cewang di langik tando ka paneh. Hari sajak walatu luhue tadi iyo lae lindok-lindo bakabuik. Sekali-kali tadanga guruah bak cando ka hujan gadang. Apo lae langik sabaliek alah mulai galok. Iyo arok bantuek lae ka hujan. Bulieh nak gadang lo hati padi di sawah nan baru kabaraja tabiek. Sajak sudah badiangi dikariangkan aie sawah nantu bia indak nyo pupueh dek manciek. 

Tadanga mangareyok paruik manandokan iyo alah litak. Alah patuik pulo kadiagiah jatah makan siangnyo. Joa kolah nan kalamk makan siang ko? Bia badaceh raso di lidah dibueknyo. Tabiek pangana mancaliek la sanggan,cruponyo ado kapareh  nan babali di pakan sinatan agak kiri-kiro satangah ons lae sisonyo. Dibuek samba ladovuwok kapareh ko iyo raso-raso ka sero. 

Yo lah dibuek malah lae. Siapkan bahan-bahannyo: 

Lado merah bulek agak 10 buah Bawang merah 5 siung Tomat  masak nan agak gadang ciek Asam kandieh agak duo kalupak Daun pisang tambah jo lidih panyamek.

Caro mambueknyo: 

Giliang lado merah sampai haluih, pakai garam kasa, jan lupo dibasuah lu Toko bawang merah tu giliangkan diateh lado Irihan tomat haluih-haluih, giliangkan ka lado tako Basueh kapareh barasieh supayo ilang kasiek-kasiehnyo.  Galimangkan jo lado nan masih di ateh batu giliang. Campekkan kasadonyo tambah jo asam kadih tadi.  Buek limeh pasagi ampek nan disamek ujuang suok kidanyo pakai lidi.  Masuekan ladovjo kapareh ka dalam limeh tadi. Taruih uwok diateh dandang nan aleh baagekan aienyo.  Alah kiro-kiro tigo puluah minik, atau alah manggalagak lado tadi angkwt dari kukusan daun limehnyo. Sali kavdalampiriang sambie diaduek-aduek bia taraso bacampue garamnyo.

Nak tambah sero makan jo nasi angek, tu gatok jariang mudo nan sadang badaceh mudonyo. Iyo kapangka talingo suok nasi dibueknyo. Namueh batambueh tigo kali kalau ndak sagan jo mintuo...

Solok, 17 September 2023....