#T.024

Sanok Durian Tandumer Ala Techno..

Bulan Ramadhan ampek baleh ampek limo ko iyo sabana istimewa. Sapanuang bulan puaso ko buah-buahan malimpah pulo. Rambutan manyirah sampai indak diambiek urang karano murah haragonyo. Duku palembang baserak dimano-mano urang manjuanyo. Sampai limo ribu sakilo dijuanyo. Manggih indak namuaeh kalah lo. Banyak lo buahnyo kini. Nan indak katinggalan sarato manjuarai iyolah buah durian. Hampie di sapanuang jalan ado sajo urang nan manggalehnyo.

Manyabuik durian lah pasti urang membayangkan mambali di tapi jalan tu langsuang mintak dibukak dek urang manggalehnyo. Dimakan ditampek tu iyo sabana sero. Apolae bakawan jo tanak sipuluik bakarambie. Raso-raso kalamak bana ko kalau mambayangkanyo.

Kalau sadang bapuaso ko kalau banyak-banyak makan durian matah iyo agak mambuek kariang karangkungan tu batuekanjadi lo. Dicampue jo cindue pun bisa jadi pilihan untuk babuko. Bacarito soal untuak babuko, Sabtu kapatang anggota Pramuka Ambalan Techno Gudep Kota Solok 02.059-02.060 pangkalan SMKN 2 Solok maadoan acara buko basamo. Pas bana salah sorang anggotanyo punyo parak durian nan buahnyo iyo sadang banyak. Kecek urang di Solok duriang Parak Gadang ko sangaik tanamo. Dibaoklah durian ko jo karuang ka rumah pembinanyo.

Dibuek kolak alah biaso. Dimakan matah langsuang indak lo sero rasonyo. Tabieklah pangana untuak dibuek sanok durian atau ado juo urang nan manyabuik durian santan. Kawan pamakannyo dibuek sipuluik bakilie jo pati santan atau banyak disabuik urang jo nasi lamak. Kabatulah sbareh sipuluik nan ado sipului sirah. Dikuekuelah tigo buah karambie nan gaek. Dibiek pati santannyo, rameh kaduo diagiah jo aie manggalagak. Durian tako dikaluan sadonyo dari kuliknyo. Digalimangkan jo santan tako agiah garam saketek bia kalua raso gurihnyo.

Supayo agak estetik penampilannyo katiko dihidangkan dicetaklah sipuluik tako. Sanok durian nan tadi alahanyatu jo santan iyo sabana rancak tampilannyo. Pakek kanta bantuek saus fla. Baunyo iyo alahurabbi manyangek wangi khas durian. Jadi kuahnyo indak jalang bantuek kolak do mako disabueik urang jo sanok. Manyanok kantako nyo. Kok istilah kulier kekinian urang tau jo TANDUMER "Ketan Durian Lumer".

Tandumer ala Techno ko indak dimakan pas babuko do tapi jadi hidangan penutup alias dessert. Baa kok lah makan nasi siap sumbayang magrib dimakanyo karano makanan satangah barek dek pakai katan tu manieh lo. Kalau dimakan pas buko bana tantu lanyang deknyo dak jadi makan nasi. Samantaro gulai lamak lo ado gulai kamumue jo ayam. Jadi diagieh wakatu keda untuak mamakanyo bia taraso ko lamaknyo.

Solok, 07 April 2024