#Tagur21

Siriah jo carano...

Bulan Dzulhijjah tingga maituang hari lae ka ditinggakan. Ndak lamo lae ka tibo pulo Muharram. Antah dek itu kolah sajak sudah rayo haji kapatang indak tangguang banyaknyo urang bakajaan manyalanggaroan manikah jo baralek. Antah dek sabab jo musabab kecek urang tuo-tuo kalau lah Muharram indak elok manyalanggaroan alek ko do. Tunggu bana bulan palapasan.

Sahinggo dalam saminggu kapatang ko jo saminggu ka muko alah sambuah undangan baralek nan ditarimo. Mayabuik masalah baralek nan lakek jo alek baradaik iyo nan takamuko siriah jo carano. Mukasueiknyo pasti ado inyo palangkok alek yoitu siriah dalam carano.

Siriah jo carano ko dalam alek-alek adaik iyo tasabuik bana. Manarimo tamu aguang alias urang gadang di acara-acara resmi. Sarupo manunggu kadatangan pajabat meskipun itu satingkek wali nagari. Apolae kok pajabat tinggi di pamarintahan nan ka mambukak suatu acara atau manjadi pembicara. Batunggu bana jo siriah carano langkok komah. indak sekedar siriah jo caranonyo sajo do, tapi pakai tari galombang atau pasambahan bagai molah.

Kalau diadaik pakawinan mulai dari maminang sajo alah dimulai siriah jo carano nangko ka jadi syarat. Pihak padusi pae maminang ka tampek nan laki-laki sarato ko manakuek hari alek carano ko nan ditanyo urang. Beko basambuang jo batimbang tando alias batunangan sampai beko manjapuik marapulai. Siriah jo carano nangko kunci utamonyo. Indak baharago laki-laki nan ka jadi marapulai indak dijapuik jo carano ko. Baitu pulo katika akaik nikah ka dilansuangkan. Tinggi harago marapulai jo keluarganyo katiko dinanti jo siriah carano ko. Apa lae nan mananti manyambuik ko bapatatah petitiehnyo. Batambah khidmat sarato tinggi raso jo pareso dibueknyo.

Carano (terjemahan kasar: cerena) atau boko (bahasa Indonesia: bokor) adalah wadah berupa dulang berkaki yang terbuat dari loyang atau logam kuningan yang dikenal di Minangkabau. Wadah ini digunakan dalam upcara adat sebagai tempat sirih beserta kelengkapannya seperti tembakau, gambir, kapur sirih. (Wikipedia).

Carano langkok jo siriah, sadah, timbakau sugi, pinang mudo pakai salapa o tirainyo indak sakadar rancak sajo dicaieknyo. Satiok inyo punyo makna sarato manyarato. Bararak dialek arak bako atau pai tunduek manjalang mintuo dari rumah anak daro ka rumah marapulai, siriah carano ko nan dimuko tagaknyo. Kecek urang kapalo arak atau kapalo galombangnyo. Urang mananti pun inyo nanti bacarano pulo. Baitu banilai jo sakralnyo. Sabagai kalangkapan adaik carano ko indak sariek-sariek bagai do, tapi jan dipamudah pulo. Adaik ko samestinyo kan indak mampasulik awak sabagai pandukuang adaik. kok indak awak nan malastarikan adaik ko, konon sia lo kolah lae....

Solok, 09 Juli 2023....