Lai tahu sanak jo asisten guru?

Asisten guru itu indak ado. Nan ado hanyo asisten dosen nan karajonyo manolong dosen di kampus atau Universitas

Asisten guruko ambo alamaikkan ka anak gadih ambo nan taruih sajo manolong ambo dalam tugas sabagai guru SMP.

Kalau maso ujian atau ulangan lah tibo, sikakak ko jo sanang hati mambantu. Baru sajo ambo tibo di rumah, sikakak langsuang tanyo apo nan bisa dibantunyo

Mungkin karano umuanyo masih mudo, mamariso karateh jawaban siswa sabanyak 6 lokal sabanta sajo dikarajoannyo.

Ambo hanyo maagihan kunci jawaban bekonyo lah manyalasaian sampai manyalin nilai ka buku nilai nan alah ambo siapkan.

Maentri nilai ka portal rapor pun ditolongnyo. Ambo sungguah batarimo kasih, karano karajo ko indak habis - habis dan batambah payah satiok tahunnyo.

Bantuak itu pulo urusan parangkat pembalajaran ambo, satalah mambuek atau maedit tugas ambo saketek, sisulung manolong mancetak atau maprinnyo.

Manolong adiaknyo mambuek pr, manggantian bundonyo nan sibuk indak manantu ko, pun dikarajoannyo, bahkan sikakakko labih saba dalam maaja.

Tapi tahukah sanak?

Anak gadih ambo iko samo sakali indak ado minatnyo manjadi guru. Pandai, rancak jo santun manjadi unggulanyo, cocok bana jadi saurang guru.

Wakatu malanjutkan ka Universitas, jo otoriter ambo manyuruhnyo mamiliah jurusan kaguruan, kalau indak tak akan ambo kuliahkan.

Jo patuah, dituruikkannyo bundonyo dan dapek lah dek gadihko jurusan elektronika di salah satu universitas, pilihan ka tigo dari tigo pilihan jurusan kaguruan nan diambiaknyo.

Maliek gadihko indak ado samangaik tapaso ambo mangalah jo mampadiakan inyo mamiliah jurusan nan inyo suko yaitu dibidang pelayanan masyarakat. Sebagai seorang perawat.

Kadang awak dak bisa mamasokan kandak walau inyo anak awak surang, walau awak raso itu elok untuak inyo.

Banyak contoh nan kamanjadi pedoman jo contoh untuk awak, bahwa indak buliah mamasokan kandak kabakeh anak. Inyo tetap mangarajoan nam wak parintahkan tapi bathinyo sampai bilo - bilo tatap mandambakan cito - citonyo. Bahkan sampai lah tuo inyo tatap barusaho pindah karajo.

Panyasalan akan tibo bagi kito urang tuonyo, bilo kito mamasokakan kandak, walau awak tau inyo bisa dan mampu dibidang itu. sarancaknyo, sarahkan sajo ka anak kito tu, apo nan taragak dek inyo, asa yang elok - elok sajo dan awak sabagai urang tuo mancarian dananyo sajo dan jan lupo mando' akan inyo ka Allah, supayo anak kito tacapai cito - citonyo jo diagiah kaputusan nan taelok dek Allah. Aamiin