Teh Isah Ulang Taun

Harita kuring keur ngobrol jeung ceu Enik, ngahaja bari ngopi jeung goreng bala bala haneut keneh, meunang nyieun si neng Siti. Ceu Enik bari ngobrol teh anteng we ngalaju hanca, ngarajut benang rek dijieun tas. Puguh ayeuna teh keur meujeuhna usum ngarajut. Geus loba hasilna eta oge aya tas, aya baju, taplak meja jeung sajabana.

Teu lila kurunyung Teh Isah bari sura seuri siga nu kapaksa padahal mah keur kurawed aya kakeuheul pangpangna mah.

"Kunaon ari Teh Isah, isuk isuk geus baeud?"

"Bete!"

"Naha make kudu bete sagala? Yeuh hirup mah heuheuy jeung deudeuh pan. Geus tong sagala teuing dipikiran. Anggur mah tuh bereskeun acara bisi barudak handeueuleun."

"Enya, kesel atuda, cape gawe teu kapake. Majarkeun teh cenah naonlah guru honorer teh teu epektip."

"Saha nu ngomong kitu teh? Bet sok lalawora teuing, ari ngomong sok tara dipikir kumaha balukarna..."

"Matak nganyerikeun hate batur"

"Nya biasa we Si eta."

Teh Isah indit deui kaluar rek ngurus barudak nu harita masih keneh lalatihan keur mintonkeun pangabisana dina widang kasenian. Sabab poe harita teh memang aya acara pentas seni.

Teu lila jol Eci...bari ngaharewos nyaritakeun Teh Isah. Majar ngahaja keur dipaseaan pedah poe ieu Teh Isah ulang taun. Geus jadi kabiasaan atawa geus jadi catur mun babaturanana ulang taun sok dibuli heula alias diheureuyan, malah sakapeung mah sok tepikeun ka ceurik sagala. Tah lamun geus kitu cingcirining usaha ngabuli na sukses.

Disatukangeun Teh Isah, Eci jeung sabalad balad na geus nyiapkeun serprais keur ulang taun Teh Isah. Ke dina waktuna rek ditembongkeun ka Teh Isah.

Wanci geus nincak kana jam 12. Waktu nu geus ditangtukeun ku Eci jeung batur batur na supaya ngumpul dikantin handap nu aya disakola.

"Hey, dimanarana? Hayu ngumpul!" Ceuk Eci dina WA.

"Dikelas. Oke oke siap. Meluncur."

"Eh, tungguin aku ya soalnya aku baru mandi." Ceuk fitri dina hp na.

"Euh biasa si eta mah sok telat wae. Buruan nya."

"Bun....hayu turun!"

Eci ngomando sakabeh babaturanana sangkan geura ngarumpul di kantin.

Sanggeus sarerea pada ngumpul...giliran Teh Isah, nu boga lalakon dina acara eta kakara dipanggil.

Katempo tikajauhan Teh Isah nyampeurkeun ka kantin bari ngalenghoy ...ti ditu na mah nyumputkeun kasedih kanyeri da puguh keur dibaeudan. Katempo paroman na rada alum.

"Sok calik Teh..." Ceukeng teh bari ngusapan pundakna, ngamimitian muka obrolan.

"Teh cik sok caritakeun kunaon, aya naon?"

Can oge kedal naon nu rek diomongkeun, pantesna geus teu kuat nahan piceurikeun, antukna segruk weh Teh Isah ceurik. Bari dareuda ...

"Ya ngga tau kenapa atuh Eci marah marah. Dia bilangnya aku dah ngelaporin ke kepala sekolah, katanya aku yang mgelaporin teh, padahal mah ga tau da aku mah ga bilang apa apa, ga ngelaporin apa apa. Itu mah fitnah."

Geus sarerea pada gunem adu catur mah...geus puguh si Teh Isah mah geus ceurik tepika eueuriheun. Komo kuring mah geus teu kuat hayang ngagakgak seuri ningali polah Teh Isah nu teu nyadar rek di ulang taun keun. Torojol neng inta mawa kue tart nu reunceum ku lilin....bari kompak sarerea nyanyi 'selamat ulang tahun'.

Teh Isah olohok mata simeuteun, teu nyana teu sangka yen babaturan teh ngahaja ngaheureyan wungkul lain serius ngambek jeung baeud.

Teh Isah niup lilin bari cumalimba keneh teu sadar keur diulangtaunkeun.

Cag ah.

#ensitha