#Tantangan Gurusiana

(tantangan hari ke-27)

Gadih Minang

Bajalan si ganjua lalai,

pado maju suruik nan labiah

Samuik tapijak indak mati,

alu tataruang patah tigo

Baitu bunyi petitih Minang,

Manyirekan gadih Minang nan lamah lambuik dalam ketegasan, tegas dalam kelemahlembutan.

Petatah minang ko alah jarang di manfaatkan di Minangkabau, apo lai nak gadih Minang nan gadang di lua Sumatra Barat.

Manuruik kato nan di tarimo dari rang tuo-tuo, ado kato nan tasurek, Ado pulo nan tasirek. Kok nan tasurek lah jaleh bisa di baco, bisa dipalajari. Kok ka dibaco jaleh tulisannyo, nan ka ditanyo jaleh ujuiknyo.

Namun Nan tasirek, indak bawujuik batulisan, baa ka mambaconyo. kok ka ditanyo apo namonyo, barang ado, indak barupo.

Bahaso tasurek bisa dipalajari di sakola, atau jo mambaco di pustaka, namun...Kato nan tasirek hanyo bisa ditarimo dalam raso jo pareso. Nan dialami dalam hiduik bakorong jo bakampuang. Ditampuah jalan makonyo pasa.

Kato nan tasirek ibaraik tau jo kieh kato sampai. tau jo rantiang ka mancucuak, tau jo dahan nan ka wemaimpok. Salayok ikan di lawik, lah tantu jantan batinonyo.

Namun, kini,.. indak bisa disasali. kok kilek camin alah ka muko, kilek baliung alah ka kaki.

Untuak nak gadih Minang. Kok kalua dari ranah bundo, apo lai basabuik asa jo muasa, kok siba baju alah tingga, nan baju kuruang jan sampai lupo,

Sungai Rumbai, 08/03/2020

Roskamidar