Tantangan hari ke 327

#tantangangurusiana

#lestarikanbahasabetawi

Babe Syarif bace Wa japri dari Mpok Setri penghuni kontrakan Babe dikampung Asih, isi pesen WA si mpok pendek aje. “Babe Syarif, aye kaga panjangin kontrakan, aye pindeh ke Bekasi, jadi kaga lanjutin ngontrak lagi”, Begitu isi pesen WA singkat padat Mpok Setri, Babe Syarif narik napas panjang, bininye liat sontak langsung tanye.

“Ngape bang tarik napas dalem banget?” Nyak Syarif pandangin lakinye.

"Ini Setri pindeh ngontrak pamit di WA,” babe nyaoutin bininye.

“Moga-moga aje Setri kaga ngontrak lagi, bise punye rumeh kendiri, kasian biar pade punye rumah dah yang pade ngontrak,” Nyak Syarif doain Mpok Setri yang kontrak di Kampung Asih.

Mpok Setri ngontrak di kontrakan Babe Syarif, lumayen lame 3 taon ade. Buat Babe Syarif juragan kontrakan pengontrak itu mitre, Babe sayang ame semue pengontrak. Kontrakan Babe Syarif lumayan ade 20 kontrakan. Babe Syarif kerje di perusahaan swaste, bininye PNS, kehidupan keluarge babe cukupan. Duit kontrakan bakal naik haji, mangkenye babe kaga galak ame yang ngontrak, tujuannye niatnye biar mabrur saat babe naik haji nanti ame bininye. Kalo ade pengontrak kaga bise bayar kontrak, terlambat sebulan Babe Syarif tanye, kapan bayar kontraknye, biasanye yang ngontrak jawab due minggu lagi ya be. Babe Syarif ame bininye lumayan sabar. Kasianan ame orang yang ngontrak, kalo lewat due bulan kagak bayar, babe minte pindeh kontrakan lain, due bulan babe ihlas kaga di bayar. Biasanye begitu, tapi nyang begitu kaga banyak, ada de satu due pengontrak. Babe kesianan aje. Penghuni lainnye alhamdulilah tepat waktu tapi sejak covid ade 3 penghuni kontrakan telat sebulan doang, babe ame yak Syarif maklumin kondisi itu.

“Assalamualaikum,” suare orang kasih salam kedengeran didepan pintu rumeh.

“Waalaikum salam, masuk Pak Joko ame ibu, silakan duduk, nyak bikinin minuman nih buat Pak Joko ame bu Joko”, penuh ramah babe nyilakin laki bini masuk rumeh.

Nyak Syarif segere buatin due cangkir teh, kelar nyediain aer nyak lanjut nimbrung ngobrol diruang depan.

“Begini be ame yak, aye bedue bini aye mau pamit, kami sekeluarge udeh ngontrak ditempat nyak babe 4 tahun, mohon maaf semua salah ame semue khilaf kami, namanye orang idup, terimakasih kami udeh ngontrak di tempat nyak babe. Kebetulan gubug kami sudeh selesai dibangun, makenye pamitan, terimakasih sudeh ngontrak di tempat nyak babe,” Pak Joko pamit penuh rase kekeluargaan yang tulus bedue bininye.

Babe dengan suare khasnye menjawab pamit Pak Joko ame bininye.

“Aye, bini aye selaku pemilik kontrakan juge minta maaf semua salah, namenye lidah kaga betulang kadang keplinter kaga sengaje, semoge Pak Joko barokah dirumah baru bapak”. Nyak babe ridho di pamitin same Pak Joko, orang nyang ngontrak serase sodare.

“Ini kunci kontrakannye be, aye udeh bersihin, semue kelar bersih sebab aye kagak ingin ningggalin kontrakan kotor, rejeki kami sekeluarge lumayan di kontrakan, biar rejeki yang lumayan ngikut kerumah baru kami,” panjang lebar pak Joko pamit undur diri, nyak babe sepenuh hati doain agar rejeki Pak Joko sekeluarge mengkinan cakep di rumeh baru Pak Joko.

lain hari saat libur laki bini barengan tengok kontrakannye yang ditempati Pak Joko sekeluarge. Alhamdulillah, kontrakan rapi jali, dari pintu depan ampe kebelakang kontrakan bersih kinclong, kage ade kotoran. Pak Joko pindah kerumah barunye, udahannya dia bersihin kontrakan seperti yang kemarin diomongin. Bersih semuanye. Dinding bersih utuh kagak ade yang retak, lantai bersih utuh kagak ade keramik pecah, Subhanallah mengkinan cakep rejeki Pak Joko. Barokallah buat Pak Joko.

“Bang, Pak Joko rajin ye, kelar pake kontrakan kaga lupe pamit, udahannye die bersihin kontrakan kite, mangkenye rejeki baiknye ikut dah kerumeh yang die bangun. Allhamdulillah yang ngontrak pindah, kaga lupe bersihin kontrakan kaga juge ngerusak. Allah kasih punye rumah, amal baik Allah lipat gandaiin ye bang rejeki lakonin baik.” Nyak Syarif bicare sembari mandangin ruangan dalam kontrakan.

“Iye, nyok dah kite tengok kontrakan yang di tinggalin Mpok Setri,” Babe ngajak bininye nengok kontrakan yang di ujung dari 3 pintu kontrakan yang ade di kampung Asih.

“Assalamualaikum”, Babe buke kontrakan pake kunci cadangan, sebab Mpok Setri kaga balikin kunci kontrakan , die pamitan di WA doang. Kate Bang Iwan sesame pengontrak "Pindahnye Mpok Setri malem, trus kaga nitip kunci be."

Laki bini masuk kekontrakan yang di tinggalin Mpok Setri. Astagfirullah, beda banget dengan yang ditinggalin Pak Joko. Kontrakan bekas di tempatin Setri kotor pake banget, dinding pecah semue padahal kaga kene gempe, lantai pada metek kramiknye, dimane-mane kotor astagfirullah. Pribadi orang bede-bede. Mpok Setri setiap bulan kerjanye ngomplenin kontrakan katenye bocor, pengep, sumpek kekecilan jendela, macem keluhan disampein ke babe lewat WA. Babe peduli same komplenan, biasanye babe minta tukang langganan benerin kalo ade bangunan kontrakan yang rusak. Husnudzon aje mungkin Setri kaga ade waktu buat pamit, walau nempatin kontrakan 3 taon, bise jadi Mpok Setri repot banget karene urusan pribadinye banyak yang belum kelar, sekali lagi husnudzon aje.

Bertaon ngadepin pengontrak nyak babe mangkinan paham mane pengontrak yang setelah pindeh cepet punye rume atas usahe sendiri, mane pengontrak yang sulit punye rumeh. Macem ragem warne care orang saat ngontrak di kontrakan. Babe Syarif paham betul hal itu. Semakin pengontrak berbuat baik ame kontrakan yang ditempatin, Allah juge ridho kasih keberkahan untuk amal baiknye, ntu aje kuncinye.

Sambil sholawatan Babe Syarif berdue bininye sergep ngebersihin kontrakan yang kotor rusak berantakan. “Biar barokah dah semua”, doa Babe syarif dalam hatinye semoge yang isi selanjutnye termasuk golongan orang orang yang masuk kedalam surgenye Allah, aamiin.

**************

{فَأَمَّا مَنْ ثَقُلَتْ مَوَازِينُهُ فَهُوَ فِي عِيشَةٍ رَاضِيَةٍ * وَأَمَّا مَنْ خَفَّتْ مَوَازِينُهُ فَأُمُّهُ

هَاوِيَةٌ * وَمَا أَدْرَاكَ مَا هِيَهْ * نَارٌ حَامِيَةٌ}

Dan adapun orang-orang yang berat timbangan (kebaikan)nya maka dia berada dalam kehidupan yang memuaskan. Dan adapun orang-orang yang ringan timbangan (kebaikan)nya, maka tempat kembalinya adalah neraka Hawiyah. Dan tahukah kamu apakah neraka Hawiyah itu?” (Yaitu) api yang sangat panas. (Al-Qari'ah: 6-11)