Sarengsena azan lohor, koletrak Sora nu muka panto. Kuring jongjon wae ngagoler dina luhur korsi.

"Enin! Bade uken daun cau nya!" Sora Si bungsu Genta ngagatraan enin anu nuju netepan.

"Bade mais hayam sugan A Genta mah!" Bari angger ngagoler kuring nyalukan.

Dasarna A Genta mah carang takol, teu nolih kana pananya kuring.

Ari Enin, ba'da uluk salam gewat we kaluar ti kamar.

"Aya daun cau teh, Gen? Bisa teu ngalana? Rawel heula atuh, tah palebah dinya anu rubak mah!" Enin nolowerang bari hariweswes.

Teu kantos lami torojol bapana A Genta, gegeroan "Nyai! hayu kadieu urang dahar ngariung, yeuh liwetna tos sadia panas keneh!"

"Liwet? Hayu atuh! Tapi lohor hela atuh meh jongjon" bari cengkat kuring ngaleos ka jamban, seja abdas.

"Hayu bi, ka bumi uwa amih! Sok raos gera liwetna kengeng uwa apih mah!" Kadangu anu ngagentraan ngajak gera ka bumi si teteh.

Solongkrong we ka pawon. Kasampak minantuna amih keur ngangkat kastrol wadah liwet nu baris diamparkeun kana daun cau di teras hareup. Ditambah sambel, asin teri, goreng jengkol katut peuteuyna, teu katinggalen oseng kangkung nu masih ngebul.

Ngan sakolepat liwet katut dulur-dulurna ledis teu nyesa saremeh-remeh acan. Sugema pisan babancakan sadudulur di tepas bumi, bari ngan saukur liwet make asin ge.

Alhamdulillahillazii wasaqona waza'alana minalmuslimiin.

#Tantangan Gurusiana Hari ke-33

#Mulok