[Mbakbrow, neng omah rak? Aku pe mrono]

[Yo, neng omah. Piye?]

[Aku pe njilih kostum tari]

[Tekan omahku lewat lawang samping. Langsung mlebu wae. Aku pe salat sik]

Let rada suwe, wong sing WA aku njedhul. Mbak Indah jenenge.

Merga aku pesen ape salat sik, deknene mlebu omah le mbukak lawang alon-alon. Padhalo aku wis bar olehe salat.

Lagek nata kostum, aku kelingan kostum sing disilih Mbak Harni durung dibalekno. Wonge Langsung tak WA, tak kon mbalekno kostumku. Langsung dibales yen deknene ape neng omahku saiki.

Aku mbatin, suwe ra tau ketemu, mesthi horeg omahku ki.

Lagi ae rampung lehku mbatin, lha kok mak pethungul Mbak Harni wis tekan omahku. Lha iki aku mesthi dadi patung. Meneng cep! Merga wong loro kancaku iku nek wis ketemu cerewete ngluwihi manuk bethet.

Teka dhog isih nek ngarep lawang. Mbak Harni crita ngethuprus, nek disapa wong ngamen sing macak Punakawan Gareng neng prapatan bangjo.

Mas Gareng tekok, "Mbak, kelompoke wong Gedanganak?"

"Iyo, Oom!" semaure kancaku.

"Omahe sapa?"

Mbak Harni nyauri, "Mbak Lastri!"

Jebulane, Mas Gareng weruh Mbak Harni nggawa perabotan tari sing ape dibalekno neng omahku. Mulane ditakoni Mas Gareng kelompoke sapa. Dikira ape melok ngamen. Hahaha ....

Gedanganak, Ungaran Timur, 1 Mei 2025