Sampai di rumah, Fahim nampak gadang ati. Nasi goreang nan di bao ka sakola untuek ari pasa, habih tajua.

"Wak bagi duo se pitihnyo, Bu."

"Ndak takah tu etongan urang manggaleh do, Im. Wak etong pokok mambuek nasi goreang ko dulu. Bara bali bareh, lado, bawang, talue, tomat, mantimun jo plastik pambungkuihnyo. Sudah tu baru labonyo wak bagi duo."

"Namueh lo takah itu dek, Bu. Payah se lah , Im manggaleh," jaweknyo ndak pueh.

"Iyo sarupo itu, sadonyo bantuek itu urang manggaleh. Kalau pitih dibagi rato, bisuek jo aa wak pokok manggaleh lai."

Ado rancak lo ari pasa nan diadoan di sakola ko. Anak-anak baraja barani, indak malu manjua galeh jo baraja baretong, manarimo pitih dan pandai maetong baliek pitih.

Mambangkik jiwa kewirausahaan kecek urang kini, manumbuahkan kreatifitas dan inovasi, tamasuak paham dunia bisnis.