Si Atun nan Sok Manih

Oleh Uki Lestari

Pakan Sinayan alah tibo pulo. Basijadilah induak-induak balanjo kaparluan rumah tanggo. Mulai dari jariang, patai, bawang, kantang, sapek, bada, lauak, ayam, dagiang, tomat, sampai ka lado. Pokoknyo langkok untuak baka salamo sapakan. Malakik Sanayan tibo baliak.

Hari ko, Si Atun pai ka pakan pulo. Si atun urang Kotobaru, tapi kini baliau tingga di Muaro Paneh. Dek urang sadang libur, Si Atun manuruik jo mintuonyo pai ka pasa Sinayan tu. Salamo ko, Si Atun tantu beres se. Ndak sato-sato balanjo ka pasa do.

Lah tibo di pasa Sinayan, indak tangguang gadang hati Si Atun do. Sanang pulo nyo mancaliak suasana pasa Muaro Paneh nan rami dek urang. Indak mungkin rami dek binatang do nak? Eits, tunggu dulu. Di Muaro Paneh pakannyo indak main-main do, sanak. Pakan taranak Muaro Paneh ko, pakan paliang gadang sa-Sumatra Barat kalau ndak salah. Jadi, yang nak bali jawi, baruak, kambiang, dan yang lainnyo, ka sikolah. Ado sadonyo mah.

Wak baliak ka Si Atun nan sok manih tadi. Sambia mangawanan mintuonyo balanjo, Si Atun mode body guard mintuonyo. Baa ka indak. Biasonyo mintuonyo balanjo sorang, kini lah baduo. Banyak urang batanyo sia yang dibawo dek mintuo Si Atun. Nyo jawablah dek mintuo Si Atun, kalau Si Atun ko anaknyo.

Nan lawaknyo, dek banyaknyo mintuo Si Atun balanjo, ditambah pulo dikawanan dek Si Atun, ado lo urang manggaleh langganan mintuo Si Atun batanyo.

"Baa kok banyak bana Etek balanjo kini ko? Ka mandoa Etek? Ko sia yang Etek bawo ko? Anak etek ko yang ka manikah?" Banyak tanyo urang tu. Galak ambo mandanganyo. Si Atun yang baranak baduo dikecekan baru ka manikah lu. Tu lah gadang lo lubang Si Atun tu kini mungkin nah sanak. Tambah sok manih lah Si Atun tu. Hadeh!

Dek kabanyakan balanjo mintuo Si Atun, banyak pulo lah tentengan nan harus dibawo Si Atun. Barek-barek nah, sanak. Asoi hitam gadang tu a, ado gak 3 buah.

Awalnyo lai ciek lu, lai dibawo dek Si Atun jo gadang hati. Kironyo, tambah lamo balanjo tambah banyak, pastinyo tambah barek. Lah mulai tangan Si Atun maragang dek dibawo bakaliliang pasa Muaro Paneh tu dek mintuonyo.

Lai dibasoan dek minto Si Atun buliah mintuonyo se yang mambawo baban tu. Tapi, dek Si Atun ko minantu yang paibo dan berbakti ka urang tuo, indak lo tapadian deknyo mintuo kesayangannyo tu jariah bana do. Bialah tangan inyo nan paradam daripado tangan mintuonyo nan lah mulai karuik, keriput nan mambawo. Toh Si Atun lai gadang lo pangka langannyo untuak mambawo-bawo. Jadi, jan sok manih pulo Si Atun tu lai. Sakali-kalinyo mancubo mode itu, indak lo ka namuah. Dioncekan ka tang aia lakang Masajik Raya Muaro Paneh tu amuah e nyo tu. Iyo nak, Sanak?

Di tangah jalan, dek lah gantiang mamerah bagian tangah. Ditambah pulo pucek dari tapi ka tapi tangannyo. Si Atun mambana ka mintuonyo. Mintuo Si Atun yang lai ibo lo mancaliak minantunyo nan lah sasak angok mambawo baban. Baranti mintuo Si Atun mandangaan bana dari Si Atun.

"Mak, apo yang ka dibali lai, Mak? Beko yang dakek-dakek se tampeknyo wak bali dih, Mak. Jaan bali lado di ujuang suok, mambali gulo ka ujuang kida. Mambana minantu Amak nan sok manih ko dih, Mak," bana Si Atun ka mintuonyo. Mintuonyo pun manjadihan. Iyo ibo pulo baliau dek minantunyo tu.

Lai nak baganti-ganti mintuo Si Atun mambawoan baban tu, tapi bakali-kali lo Si Atun manulak. Selagi ado inyo nan lai babadan, indak ka tapadian mintuonyo nan lah mulai lamah tu mambawo baban barek do. Ditambah pulo mintuonyo baru sudah sakik tulang rusuaknyo patang lu.

Nan ditunggu-tunggu pun tibo. Balanjo salasai untuk samantaro lu. Si Atun pulang jo onda, mambawo lanjo. Panuah onda tu dek bahan balanjo . Ndak lo bagarah gadang hati Si Atun bajalan ka arah parkir onda. Raso kalua dari sarang nago dek Si Atun kalua Pasa Muaro Paneh tu.

Gadang hati Si Atun batambah katiko inyo, iyo lo mambawo pulang makanan zaman saisuak. Kulek-kulek yang payah dibali kalau di tampek lain. Mode cirik kudo, oyak-oyak, onde-onde atua, godok pisang, godong kacang padi, godok ubi, godok katan hitam nan baagiah luo di dalamnyo, tu banyak lai makanan tu yang ndak tau dek Si Atun namonyo do.

Aa, kan sok manih juo Si Atun tu liak a. Ndak nak nyo cari tau namo makanan ciek-ciek do. Maklum se lah yo, Sanak. Maklum se kalau Si Atun tu tapi indak urangMuaro Paneh do. Rang kanannyo nan urang Muaro Panehnyo.

Kironyo, nan mintuo Si Atun babaliak ka dalam pasa liak. Ado juo yang ka dibali lai. Pas lo azan bakumandang. Si Atun sumbayang di rumah, samantaro mintuo Atun sumbayang di masajik pasa.

Itulah carito Si Atun nan mqnuruik ka Pasa Muaro Paneh hari ko. Iyo, Si Atun tu sok manih. Baru sabanyak tu baban balanjo nan dibawo, lah sok-sok ragang pulo tangannyo. Urang se labiah dari itu. Ndak kadialahnyo urang do. Atun, Atun...

Muaro Paneh, 21 Desember 2020