ZUMBA ALA UMI NATAN

Oleh Uki Lestari

Sabananyo mah, alah lamo mah nak bazumba-zumba ria ko. Tapi alum juo ka sampaian lai do. Dek apo? Ambo salaku umi Natan alias Naura jo Tanha ko sibuk tak menentu se.

Nan badan alah tambah bangkak juo. Nan makan tambah lamak yo. Nan pangana lai ndak samak do. Tantulah bantuak dorom baguliang-guliang jadinyo beko lai, kalau dipadiaan juo.

Makonyo, di Akek nan santai nan ko, ambo cubo lo bazumba gak salayok. Tapi zumba ambo ko bukan di tampek nan rami. Atau di tampek-tampek les zumba bak cando-cando mahmud tu do. Lai tau mahmud dek, Sanak? Aaa,, iyo itu. Mamah muda bak kecek urang kini.

Zumba ambo beda jo zumba mahmud tu, Sanak. Zumba ambo di dalam biliek se jadi tu mah. Ambo urangnyo pamalu. Ndak pede kalau bagoyang-goyang dakek urang rami tu do.

Ditambah pulo, indak dibanakan di dalam agamo awak do, padusi bagoyang-goyang di tampek nan tabukak jo jo tampek nan rami. Yang ado laki-laki yang indak mahromnyo nan mancaliak.

Kalau di dalam ruangan indak baa doh. Kok lai tajamin padusi samo padusi se di dalamnyo. Tapi ambo indak juo bisa sato do. Dek sibuk. Sibuk apo kolah, ambo ndak lo tau do.

Ambo mamiliah olahraga iko, sabeknyo ambo maraso kalau olahraga ko sado anggota badan manggarik. Mulai dari kaki sampai kapalo. Yo kalua paluah dek bazumba ko.

Nan labiah lamak lo, modalnyo ndak sabara do. Hanyo badan nan ka digarik-garikan jo paket internet untuk mamuta vidio di youtube.

Itu se modalnyo, indak juo ka namuah? Kadang niek tu bana nan indak ado mako indak ka takarajoan juo mah. Mode internet, ambo ka pakai internet juo taruihnyo. Untuak manggaleh jo mancari ilmu.

Di biliek ambo basijadi pulo bazumba. Indak ambo se surang do. Nan anak ketek baduo tu sato lo inyo. Nan apak paja indak dibuliahan masuak do. Dek apo?

Nio tau bana atau nio tau se? Haha. Yo tantulah ndak buliah apak paja mancaliak. Kok sato lo baliau, lah sudah nyo kasanangan mancaliak urang basenam di dalam HP, beko ndak jadi sudah zumba ambo beko tu do.

"Ha, baa kok ndak sudah pulo?" pasti sanak batanyo di dalam hati. Tu yo nyo, beko apak paja tu lah duduak se di muko HP. Takalam ambo deknyokan. Mode itu, Sanak.

Iko se kini lah bamandi paluah ambo mah, Sanak. Tu bapikia ambo kan, kok mode iko se ambo tiok hari, namuah lo body ambo bantuak Britney Spears sangkek mudo dulu mah nak.

Mudah-mudahan se lah nak, Sanak. Apolai lah baranak duo umua kapalo tigo ko, yo paralu manjago badan. Sabeknyo, lawan banyak di lua, Sanak. Hahaha.

Yolah, Sanak. Wak antian dulu bacarito soal zumba ko yo. Ambo nak mandi ciek lu. Sabanta lai urang abang lo lai kan. Basiap-siap ambo ciek lu. Lah kali.

Solok, 16 Februari 2020